Bible in duytsche (Delftse bijbel 1477)

§ Ca .v

1

OPten derden dach dede hester hare coninclike cleder an ende si stont int vrijthof van sconincs huse dat binnen was van sconincs pallayse. Ende hi sat op sijn stoel in dat dinghuys vanden pallays teghen die dore vanden huse.

2

Ende als die coninc die coninghinne sach staende soe ghenoechdese sijnen oghen: ende hi stac die gulden ruede ieghen haer wt die hi in die hant hielt. Ende si quam voert ende custe die roede ant einde:

3

ende die coninc seide tot haer. Coninghinne hester wat wilstu. Wat is dijn heysch? Ist dattu oec half trike eyste. men salt di gheuen.

4

Ende si antwoerde. Op dat den coninck ghenoghet soe bidde ic dattu

[p. *162]

huden coemste ende aman ter werscap die ic ghereed hebbe.

5

Ende thant seide die coninc: roept haestelijc aman dat hi gehoirsaem si hesters wille. Doe quamen die coninc ende aman ter werscap die hem die coninghinne ghereet hadde:

6

ende die coninc seide na dien dat hi ouertallic wijn ghedroncken hadde Wat heisschestu datmen di gheue ende om wat dinghen versoecstu? Ist oec dattu half mijn rijc heyste du sulstet hebben

7

Ende hester seide hem. Mijnen heyssche. ende mine bedinghe sijn dit

8

Heb ic gracie vonden in sconincs aenscouwen. ende op dat den coninc ghenoghet mij te gheuene dat ic heyssche. dat hi mine heissche voldoen wil: soe sullen die coninc ende aman comen ter werscap die ic hem bereet hebbe: ende morghen sal ic die coninc minen wille ondoen.

9

Ende hier om ghinc aman op dien dach wt blidelijc ende lichtelijc. Ende doe hi mardocheum sitten sach vore die poorte vanden pallayse dat hi niet op en stont ieghen hem noch hem en porrede vander stat so wort hi harde gram:

10

ende al veynsende sijn gramscap soe keerde hi weder in sijn huys ende vergaderde te hem sijn vriende ende zares sijn wijf:

11

ende hi vertelde haer die grootheit van sinen rijcheden ende die scare van sinen kinderen: ende in hoe groter glorien datten die coninc verheuen had bouen alle sine princen ende knapen.

12

Ende hier na seide hi. Ende hester die coninghinne en riepe oec niemant el ter werscap mitten coninc sonder mi: ende ic sal oec morghen mitten coninc ende mit haer maeltiden.

13

Ende al heb ic al dit mi dunct dat ic niet en heb also langhe als ic mardocheum den iode voer die poorte vanden pallayse sie sitten.

14

Ende zares sijn wijf ende sijn ander vrienden antwoerde hem. Ghebiede te ghereiden ene hoghe balke die vijftich cubitus hoech si: ende seg morghen den coninc datmenre mardocheum aenhanghe: ende also sulstu blidelijc mitten coninc ter werscap gaen