Bible in duytsche (Delftse bijbel 1477)

§ Capittel .iiij.

1

DOe dit mardocheus ghehoert had soe scoerde hi sine cledere: ende hij dede een sacrocke an. ende warp assche op sijn hoeft: ende hi riepe in die strate in midden die poorte mit groter stemmen ende hi thoende die bitterheit sijns moets:

2

ende mit desen gherope ghinc hi totten doren van sconincs palayse: want en was niet gheoorloft dat ene mit enen sacrocke mochte binnen sconincs sale gaen ofte comen.

3

In allen prouincien ende steden ende poorten daer sconincs felle ghebot quam. daer was onder die ioden groten ghewene vasten huylen. ende screyen. ende vele besichden sacrocken ende asschen ouer haer bedde

4

ende hesters cameriere ende camerlinghe

[p. *161]

ghinghen in ende seident haer. Ende doe sijt hoerde soe wort si veruaert: ende si sant hem een cleet dat hi den sacrocke afdoen soude ende doent ane. Ende hij en wout niet ontfaen.

5

Ende sij dede athach den camerlinc te haer comen die haer die coninc te enen dienre ghegheuen hadde: ende si beual hem dat hi gaen soude tot mardocheum ende vernemen van hem waer omme dat hi dat dede.

6

Ende atach is wtghegaen tot mardocheum die inder strate vander stat stont voer tpallays.

7

Ende mardocheus seit hem al dat daer gheschiet was. hoe aman beloeft had siluer te brenghen in sconincs tresoren om der ioden doot:

8

ende hi gaf hem vanden exemplare vanden vonnisse dat in susis hinc dat hijt der coninghinnen thonen soude: ende dat hij se vermanen soude dat si totten coninc ingaen soude. ende dat si hem bidden soude ouer haer volc.

9

Athath keerde weder ende seide hester al dat marchodeus gheseit had.

10

Ende si antwoerde hem: ende seide dat hijt mardocheo segghen soude:

11

alle sconincs knapen ende alle die prouincien die onder hem sijn weten. dat man ofte wijf die ongheropen coemt in sconincs binnenste vrijthof datmen sonder enighe merren stapphans dootslaen sal: en si dattie coninc te enen teyken van goedertierenhede die gulden ruede te hem waert steect: ende dat hi also te liue moghe bliuen. Hoe sal ic dan moghen ingaen totten coninc: die te hant binnen dertich daghen te hem niet gheropen en bin?

12

Doe dit mardocheus ghehoert hadde:

13

soe ontboet hi echter hester ende seide. En wane niet dattu allene dijne ziele verlossen sulste: want du biste in sconincs huys voer alle die ioden

14

Want zwighestu so sullen die ioden worden verlost bi anderen occusoene: ende du ende dijns vaders huys sulstu veruaren. Ende wie weet oftu hier om ten rijc ghecomen biste om dattu in dustanen tiden souts worden ghereet?

15

Ende hester ontboet echter mardocheo ende seide.

16

Ganc ende vergadere alle die ioden die du in susis vinden sulste: ende bid voer mi En eet noch en drinct binnen drie daghe noch in drie nachten: ende ic sal oec vasten mit mijnen ioncwijuen: ende dan sal ic gaen totten coninc ongheropen ende doen ieghen die wet. ende ic sal mi seluer leueren ter doot ende ter vresen.

17

Dus ghinc mardocheus ende dede al dat hester beuolen hadde