Bible in duytsche (Delftse bijbel 1477)

§ Capittel .iij.

1

HIer na verhief die coninc assuerus aman amadathi soen die van agags gheslachte was: ende hi settede sijnen troen bouen alle die princen die hi hadde.

2

Ende sconincs knapen die binnen der dore vanden pallayse wanderden si vielen op haer knyen: ende aenbeden aman Want die coninc had hem also beuolen. Mer mardocheus en knyelde voer hem niet: noch aenbedene niet.

3

Ende sconincs knapen seiden hem die vore die dore vanden pallayse saten. Waer om en houstu niet sconincs gheboden buten alden anderen?

4

Ende doe si hem dit dicwile seiden. ende hijs niet horen en wilde: so seiden sijt aman ende begeerden te wetene ofte hi inden sentencien ghedueren soude. Want hi had hem gheseit dat hi een iode waer.

5

Als dit aman ghehoert had ende hijt bi teikenen had gheproeft dat mardocheus voer hem niet en knyelde noch hem aenbede. so

[p. *160]

wort hi herde gram:

6

ende het dochte hem niet dat hi allene sine hant an mardocheo doen soude: want hi had ghehoert dat hij vanden ioetschen volc waer: want hi wilde bet alt gheslacht vanden ioden verderuen die in assueres rijc waren.

7

In deser maent die nysan hiet so inden twaelfsten iaer van assuerus rijc. soe warpmen tlot in een kanne die in hebreeuschen phur heet vore aman. in wat dage ende in wat maent datmen al die ioden doot slaen soude: ende die twaelfste maent quammer wt diemen ader heet.

8

Ende aman seide tot assuero. Eenrehande volke is ghestroeyt al dijn prouincien dore dat onderlinghe verscheiden is van hem seluen. dat nuwe wette ende oefeninghe hout. dat hier en bouen sconincs gheboden veronwaert: ende du weetste wel dat dijnen rijc niet profitelijc en is dattet ghedurich blijue bij oerloue.

9

op dattet di ghenoghet ghef vte datmen die verderue: ende ic sal den houders van dijnen tresore weghen tien dusent talente.

10

Ende die coninc nam sijn vingherline wt sine hant dat hi besichde: ende gaft aman amadathi soon van agags gheslachte der ioden viant:

11

ende hi seide tot hem. Dit siluer dattu beloefte si dijn: ende doch mitten volke datti ghenoghet.

12

Ende men riepe die scriuers. in die eerste maent nysan opten dertichsten dach van dier seluer maent: ende men screef also aman beuolen had tot alle des conincs baronen. ende den rechters vanden prouincien van menigherhande luden. also elke luden horen mochten ende lesen in menigherhande tonghen van sconincs assuerus name: ende men bezeghelde die letteren mit sijnen vingherline

13

ende men santse mit sconincs lopers tallen prouincien. datmen doot slaen soude ende afdoen alle die ioden vanden kinderen totten ouden mensche cleyne kindere ende wijue op enen dach. dat was opten dertiensten dach vander twaelfster maent diemen heet adar: ende dat si haer guet nemen souden.

14

Want dit was die sinne vanden letteren dat dit alle prouincien weten souden ende hem ghereiden teghen den voerseiden dach.

15

Ende die lopers diemen sant die haesten hem om sconincs ghebot te voldoen. Ende thant ghinc binnen susis tfonnisse van sconincs weghen: die coninc ende aman hielden werscap: ende al die ioden die in die poorten waren weenden.