Bible in duytsche (Delftse bijbel 1477)

§ Capit .ij.

1

ALse dese dinghen dus ghedaen waren na dien dat sconincs gramscap vercoelt was so ghedacht hi vasti beide dat si ghedaen hadde ende dat sij oec ghedoecht hadde:

2

ende sconincs kindere

[p. *158]

ende sijn knapen seiden. Men soke den coninc ioncwijuen magheden ende schone.

3

Ende men sende enighe die alle die lande dore merken die scone ioncwiuen ende ioncfrouwen ende maechden ende sij brenghense in. ter stat susan ende si sullense leueren inder wiue huys onder egei dies ghelubs camerlincs hant die proeft ende behueder is van sconincs wiuen. ende si ontfaen vrouwelike oeffeningen ende ander dinghen die haren castumen notorftich sijn.

4

Ende soe wie onder hem allen sconincs oghen ghenoghen sal: sij sal regneren ouer vasti. Dese redenen ghenoechden den coninc ende also sij hem gheraden hadden also dede hi doen

5

Binnen der stat was een man een iode die mardocheus hiet iaers soon semein soens. die cys soon was van yemeni geslachte

6

die ouer bracht was van iherusalem. te dien tiden dat nabugodonosor die coninc van babilonien oueruoerde ieconiam den coninc van iuda:

7

ende hi was voester here van edisse diemen anders hiet hester sijns broeders dochter: ende sij had vader ende moeder verloren: sere schone ende minlijke an aensichte. Ende doe haer vader ende moeder doot waren : so begeerdese mardocheus te sijnre behoef te eenre dochter.

8

Ende doe sconincs ghebot vermaert wort. ende men na sijn ghebot vele schone maechden te susan brachte ende mense egeo den camerling leuerde: so wort hem oec gheleuert hester onder dander ioncfrouwen: datmense houden soude onder tghetal vanden wijuen.

9

Ende si ghenoechde egeo: ende si vant gracie in sijnen aenscouwen. soe dat hi haeste te hare wijflike oeffeninghe ende hi leuerde haer hare gedeele. ende seuen alte schone ioncfrouwen van sconincs huse: so dat hi haer ende hare camerieren pareerden ende aernste daer ane hadden.

10

Mer si en wilde hem haer volc niet segghen noch haer lantscap. Want mardocheus hadt haer beuolen dat sij alte male daer of swighen soude:

11

ende hi wanderde daghelicx voer tportale van dien huys daermen die wtghecoren maechden in hielt: ende had sorghe om hesters salicheit. ende om dat hi weten woude wat hester gheuallen soude.

12

Ende als elcker ioncfrouwen tijt comen was bi ordinancien so dat si totten coninc ingaen souden. ende sij ghedaen hadde dat ter vrouwen oeffeninghe behoerde so keerde die twaelfste maent: ia aldus dat si hem ses maent salueden mit olyen van mirren: ende si besichde noch ander ses maent eenrehande ander salue.

13

Ende als sij ten coninc ingaen souden. soe wat dat si heisschede hem mede te parerene dat gafmen hem: ende si ghinghen ghepareert also si wilden: vander ioncfrouwen camere tot sconincs slaepcamere

14

Ende die daer sauonts incomen was sij ghinc smorgens vte: ende men leidse van daer in dander vrouwen huys die onder sasagazi des ghelubts camerlincx hant waren. die bouen sconincs vriendinnen gheset was: ende si en hadden voertmeer ne ghene machte totten coninc in te gaen die coninc en had ghewout ende hi en hadse beuolen te comen bi haren name.

15

Ende doe die tijt ouerle-

[p. *159]

den was. bi ordinancien: soe naecte den dach dat hester abiahel mardocheus broeder dochter die hi vercoren hadde tot sijn dochter. dat si ingaen soude totten coninc. Ende si en hiessche ghene vrouwelic behagelheit: mer dat egeus die camerlinc bewaerre der maechden wilde: dat gaf hi haer te hare vercieringhen. Want si was harde schone ende mit ongheloefliker schoenheit: soe dochte si in allen menschen oghen bequame ende minlic.

16

Ende aldus wort si gheleit tot assuerus sconincs bedde in die thiende maent diemen thebet hiet. inden seuende iare van sijnen rike

17

ende die coninc mindese mere dan alle die wijuen: ende si had gracie ende ontfarmherticheit voer hem bouen alle wiuen ende hi settede die crone vanden rijc op haer hoeft: ende hi deedse regneren in vasthi stat.

18

Ende hi beual te gheredene ene harde grote werscap allen sijnen princen ende sijnen knapen: om die vergaderinghe ende brulocht van hester: ende hi gaf vierte alle sijnen lande: ende hi gaf ghiften na sijne prinselike moghentheit.

19

Ende doemen anderwerue maechden sochte. ende vergaderde. soe woende mardocheus voer sconincs dore:

20

ende hester en had uoch haer lantscap niet gheseit noch haer volc. alsoe haer mardocheus beuolen had. Want so wat dat hi beual dat hielt hester: ende si deet also si plach als sij cleyne was ende hijse voede.

21

Ende te dien tiden dat mardocheus voer sconincs dore woende. soe worden gram bagathan ende thares twe van sconincs camerlinghen. die dorewachters waren ende bouen die eerste poerte vanden palayse waren ende sij wilden hem setten ieghen den coninc om hem te dodene.

22

Mer dit wiste mardocheus. Ende hi seit te hant der coninghinnen hester: ende si seit den coninc wt mardocheus name die dese dinc te haer bracht had.

23

Men socht ende men vant also: ende men hinc elcke aen ene galghe. Ende die coninc gheboet dat ment int boock der ghedeinckenisse scryuen soude: op dat hij voer sijn leuen weder omme wat gheuen mochte. Ende men screef in die iaerlijcke historien die gheschiente voerden coninc.