Bible in duytsche (Delftse bijbel 1477)

§ Capit .I.

1

IN sconincs asswerus daghen die regneerde van indien tot ethiophen bouen hondert ende seuen ende twintich prouincien:

2

doe hi sat inden trone van sijnen rijc: so was in die stat susa tbeghinsele van sijnen rijc.

3

Inden derden iare van sijnen rike soe maecte hi eene grote werscepe vore hem allen sijnen princen. ende sijnen kinderen den starcsten van persen ende den edelen luden van meden ende den prouoesten vanden prouincien voer hem:

4

om dat hi tonen soude die rijcheden der glorien sijns riken ende die grootheit. ende die verweentheit sijnre machte vele tijts: dat was hondert ende tachtentich daghe durende.

5

Ende doe die daghen vander werscepen waren voldaen. so node hi al tvolc datmen vant in susis vanden meesten totten minsten: ende hi beual die werscap te ghereidene seuen dage int vrijthof des boemgaerts ende des bosch. die mitter conincliker hant ende oefeninghe ghewracht was.

6

Ende in allen zijden hinghen gordinen van verwen blaeuwe root ende ghelue. die hinghen aen coerden van witten ziden ende purpur: ende mit yuoernen rincskens. ende die waren onderset mit colummen van marmore ende opt pauement dat ghepaueert was mit witten ende menigherhande ander marmorstene dat wonderlike schone was van menigherhande werke daer op ghewracht waren gulden ende silueren beelden.

7

Ende die ghene diere ghenodet waren. droncken wt gulden coppen: ende men bracht die spijse in mit menigherhande vaten Men gaf daer oec die oueruloeyende ende voer barighe wijn alsoet den moghentheit vanden coninc toebehoerde:

8

ende niemant en was die die luden dwanc te drincken dies niet en wouden mer die coninc haddet dus gheordineert ende bouen elke tafel gheset van sijnen princen: dat elke nemen soude dat hi wilde.

9

Ende die co-

[p. *157]

ninghinne vasti maecte ene werscap van wijuen iuden palayse daer die coninc assuerus had pleghen te wonen

10

Ende opten seuenden dach doe die coninc blide worden was ende hi na te vele te drincken verwarmt wort vanden wijn so beual hi mauman ende bazatha ende arbona ende bagatha ende abgatha ende sarach ende carchas den seuen ghelubden camerlinghen die vore sine aenscouwen dienden

11

Dat si die coninghinne in halen souden voerden coninc. mitter cronen op haer hoeft gheset: om dat hij alden volc ende den princen haer schoenheit thonen soude. Want si was harde schone.

12

Ende si en wouts niet doen. om sconiucs ghebot dat hi mit sijnen camerlinghen ontboden had so veronwaerde si te comene. Ende hier bi wort die coninc gram ende mit groten toorne verwarmt.

13

ende hij vraechde den seuen wijsen die altoes naden conincliken zeden bi hem waren ende hi dede al bi haren rade. ende si wisten die wette ende rechten der meerderen

14

want die eerste waren die naeste carchena ende zethar ende admatha ende tharsis ende mares ende marsena ende mamucha die seuen princen van persen ende van meden. die sconincs aensichte saghen ende die eerste plaghen na hem te sitten:

15

onder wat sentenci vasty die coninghinne wesen soude die sconincs assuerus ghebot niet doen en woude dat hi bi sijnen camerlingen ontboden hadde.

16

Ende mamucha antwoerde daert die coninc ende die princen hoerden Die coninghinne vasti heuet den coninc allene niet misdaen: mer oec heeft sij misdaen alle den princen ende den volke die in al sconinis assuerus provincien sijn.

17

Want der coninghinnen woerden zullen wtcomen voer alle die wijue ende si sullen haeren man veronwaerden ende segghen. Die coninc assuerus beual dat die coninghinne vasti te hem inquame. ende si en wouts niet doen:

18

ende bi desen exempel so en sullen alle die vrouwen van meden ende van persen niet micken op haer mannen ghebode. Ende hier bi ist rechte dat die coninc vergramt is.

19

Duncket di goet so gae ene ghebot vte van dijnen aensichte. ende men scrijft na die wet van persen ende van meden die niet gheoerloft en is te breken: dat vasti en ghene sins meer in comen sal totten coninc: mer hare rijc sal ene ander ontfaen die beter is dan si.

20

Ende men ontbiede in alle dijn rike dit: dat alte wijt is: dat alle ghehuwede vrouwen beide der groter mannen ende der cleynre mannen haren man ere doen.

21

Sijn raet ghenoechde den coninc ende den princen. Ende die coninc dede bi mamucha raet

22

ende hi sant letteren tot allen prouincien van sijnen rijke: in menigherhande tonghen ende letteren alsoet alle die luden horen mochten ende lesen. ende die mannen waren princen ende die meeste in haren husen: ende dede hi vermaren so onder al tvolc.