Bible in duytsche (Delftse bijbel 1477)

§ Capittel .xv.

1

ALs theer hoerde dat holofernes onthoeft was. soe vloe tghedachte ende raet van hem: ende si worden mit anxte ende mit vresen so sere beuaen so dat sij die vluchte te salcoerse namen:

2

also dat niemant mit sijnen vrienden spreken en mochte: mer haer hoeft nederwaert hanghende so begheerden sij tonvlien ende lieten alle dinc ende vlouwen den hebreeuschen. dien si hoerden ghewapent op hem comen: dore die weghen vanden couteren ende dore die paden vanden berghe.

3

Ende doe die kinder van israhel hem vliende saghen so liepen si hem na: mit trompen blasende ende al ropende na hem

4

Ende om dattie van assirien niet ghehoopt te gader en vlouwen nederwaert ende die kinder van israhel hem na uolgeden mit eenre scaren. so versloghen si alle die ghene die sij vinden mochten.

5

Ende ozias sant boden tallen steden ende boetscappen van israhel.

6

Ende hier om sant elc lantscap. ende elke poorte al haer wtuercoren iongheluden ghewapent na die van assirien: ende si volchden hem na in des swaerts mont tot dat sij quamen toten einde van haren lande

7

Mer dander die in betulia waren. sij ghinghen in dien van assirien ghetelden: ende si droeghen noch den roef dien die van assirien achter ghelaten hadden doe si vlouwen: ende si waren sere gheladen.

8

Ende die ghene die den strijt ghewonnen hadden sij keerden weder in betulia. ende si droeghen wech mit hem alle dat diere van assirien gheweest had: so dat ghene getal en was vanden beesten ende vanden paerden ende in al haer hauelijc goet: so dat sij alle vanden minsten totten meesten rijc worden van haren roue.

9

Ende ioachim die hoghe bsciop quam wt iherusalem mit alle sinen papen in betulia: om iudith te sien.

10

Ende doe si te hem wt ghegaen was: so benediden sijse al mit eenre stemmen ende seiden. Du biste glorie van iherusalem. Du biste die blijscap van israhel. Du biste die eersaemheit van onsen volke:

11

want du heefste manlijc ghedaen ende dijn herte wort vrome om dattu suuerheit ghemint heefste. ende na dijnen man ne ghene andere bekent en heefste: hier om so heeft di ons heren hant verstout. ende hier om sulstu ewelijc gebenedijt wesen.

12

Ende alt volc seide dat moet geschien dat moet geshcien

13

Want diere van assirien roue mochten cume binnen dertich daghen vergadert worden vanden volke van israhel.

14

Mer al datmen vinden mochte dat holofernes hauelic goet was: gauen si iudith in goude ende in siluere ende in clederen ende in preciosen stenen ende in alrehande alame

15

ende tvolc leuerdet haer al. Ende al tvloc verblide in organen ende in

[p. *155]

cytolen. mit wijuen ende mit maechden: ende mit ionghelinghen.