Bible in duytsche (Delftse bijbel 1477)

§ Ca .xiiij.

1

ENde iudith seide tot alden volke. Hoert mi broedere hanghet dit hoeft bouen uwen muren:

2

ende het sal wesen als die sonne wtcomen sal. so sal elc sijne wapene nemen ende trect vte mit gheruchte: niet dat ghi nederwaert gaen sult mer als of ghi gheruchte maket.

3

Dan salt den verspiers noot sijn dat sij vlien om haren prince te wecken te stride.

4

Ende als hare barone lopen tot holofernes woninghe. ende si sijnen buuc sullen vinden ghewentelt in sijn bloet: soe sal vrese op hem wesen.

5

Ende als ghi ghewaer wort dat sij vlyen sullen so gaet hem vromelijc na: want die here salse vertreden onder uwe voet.

6

Doe achior sach die machte die israhels god dede soe liet hi der heydenen zeden ende gheloefde gode: ende hi besneet tvleysche sijns ouersloefs. ende hi wort totten volc van israhel ghedaen: ende al die nacomelinghen van sijnen gheslachte. tot in desen daghe

7

Ende thant doe die dach rees so hinghen si bouen die mure holofernes hoeft: ende elc man sine wapen: ende toghen vte mit groten gheruchte ende gherope.

8

Ende doe dat die wachters saghen: so liepen sij tot holofernes woninghe.

9

Ende die ghene die in die woninghe waren quamen ende maecten gheruchte voerden inganc vander slaepcamere. ende om holofernes tontwecken so pijnden si hem gheruchte te maken om dat holofernes ontwaken soude. vanden ghenen die gheruchte maect ende niet van weckers.

10

Want niemant en dorst voer die woninghe der machte van assirien cloppen noch ontdoen ende daer ingaen.

11

Mer doe die barone ende die tribune ende alle die meeste vanden here van assirien comen waren: so seiden si totten camerlinghen.

12

Gaet in ende wectene: want muse die wt haren.hole getogen sijn si sijn so coene worden dat si ons te stride rope.

13

Doe ginc vagao in sijn slaepcamere ende stont vore die gordine ende hi sloech sijn hande te gadere: want hi waende dat hi mit iudith sliep.

14

Ende doe hij ghene verporren en vernam mitten oren vanden ghenen die daer lach. soe ghinc hi neuen die gordine ende doe hijse op hief ende hi holofernes buuc sach sonder sijn hoeft ghewentelt in sijn bloet legghende op die aerde: so riepe hij mit groter stemmen ende mit ghewene. ende hi scuerde sijn cleder.

15

Ende ghinc in iudiths camer ende en vanter niet.

16

Ende hi spranc wt totten volke ende seide. Ene hebreeusche

[p. *154]

wijf heeft lachter ghedaen in nabugodonosors huys sconincs. Want siet holofernes leit op daerde. ende sijn hoeft en is an hem niet.

17

Doe dit ghehoerden die princen der machte van assirien. soe scoerden sij alle haer clederen: ende op hem viele een onuerdrachlike vrese ende anxte: ende haer ghedachten worden harde sere veruaert.

18

Ende int midden van haer ghetelden wort een ouertallich ropen.