Bible in duytsche (Delftse bijbel 1477)

§ Ca .xiij.

1

ALset auont geworden was so haesten hem sijne knapen te hare herberghen waert: ende vagao sloot die dore vander slaepcameren ende ghinc wech.

2

Want sij waren alle vermoeyt vanden wijn

3

Ende iudith vas. allene in die slaepcamere.

4

Mer holofernes lach opt bedde versmoert van groter donckenscap

5

Ende iudith seide tot haren ioncwijue: dat si buyten die camere stonde ende wachtede.

6

Ende iudith stont vore tbedde. ende bede mit tranen haer lippen roerende soe seide sij al stillekijn.

7

God here van israhel verstoute mi. ende aensich te deser vren ten werke van mijnen handen: dattu iherusalem dijn stat verhefste alsoestu beloeft hebste: ende dat ic ghepeyst hebbe ende gheloeft bij dijnre hulpen moghen te volbrenghen dat sal ic voldoen.

8

Ende doe sij dit gheseyt had: so ghinc sij totter colummen die ten hoefde van sijnen bedde was:

9

ende si ontknochte sijn swaert datter aen ghebonden hinc. Ende als si tswaert opgeheuen hadde soe nam si thaer van sinen hoefde ende seide. Here god van israhel verstoute mij in deser vren.

10

Ende si sloech tweweruen in die nacke. ende sloech hem thoeft of: ende si dede sijne vlyech nette vanden colummen. ende si keerde sijnen lichaem den buke om.

11

Ende na een luttel soe ghinc

[p. *152]

si vte ende si gaf holofernes hoeft haren ioncwijue ende si beual haer dat sijt stake in haer male.

12

Ende si ghinghen beide vte also si plaghen als ofte si te bedinghen ghegaen hadden. ende sij leden den ghetelden: ende sij ghinghen die valeye om. ende quamen ter poorten vander stat.

13

Ende iudith seide van verre den wachter vanden muren. Doet op die poorte want god is mit ons. die ene doeghet heeft ghedaen in israhel.

14

Ende het gheuiel doe die mannen haer stemme hoerden: so riepen sij die papen vander stat.

15

Ende liepen haer alle te ghemoete vanden minsten totten meesten: want si waenden thant dat si niet weder en soude gecomen sijn.

16

Ende sij ontstaken vuerpannen ende si stonden alte ringhe omtrent haer. Ende si ghinc bouen op ene hoghe stat staen. ende dede maken ene ghestille. Ende doe si alle sweghen:

17

so seide iudith. Looft den here onsen god die niet ghelaten en heeft die ghene die in hem hopen:

18

ende in mi sine deerne heeft hi sine ontfermherticheit voldaen die hi den huse van israhel gheloeft heeft: ende in deser nachte heeft hi in mijne hant doot ghesleghen sijns volcs viant.

19

Ende si toech vter malen holofernes hoeft: ende thoendet hem ende seide. Siet hier holofernes hoeft sprincen diere van assirien. Ende siet hier sijn vliech nette daer hi in lach in sijnre donckenscap: ende daer versloech hem die here onsen god mit eens wijfs hant.

20

Want leeft hi die here soe heeft mi sinen enghel behuet beide doe ic van hem ghinc ende doe ic daer was ende van daer hier weder comende: ende die here en liet mi sine ioncwijf niet worden besmet: mer sonder smetten van sonden so heeft hij mi weder ghebracht. te v verblideude in sijnen seghe. ende om dat ic ongaen bin: in uwe verlossinghe.

21

Loeften alle want hi is goet. want sine ontfermherticheit is inden eweliken.

22

Ende si aenbeden alle den here ende seiden tot haer Die heer heefti ghebenedijt in sijnre crachte: die bi di onse viande te niete ghemaect heeft.

23

Ende ozias die prince des volcs van israhel seide tot haer. Dochter du biste ghebenedijt vanden here den hoghen god bouen alle wijuen vanden lande.

24

Ghebenedijt si die here die sciep hemel ende aerde: ende die di beleit heeft inden wonden van sprincen hoeft onser viande:

25

want hi huden dus dijnen name verheuen heeft. soe dat dijn prijs niet vergaen en sal vander menschen monde. die ewelijc sheren machte ghedencken sullen: om dattu om dese dinghe dine ziele niet ghespaert en heefte om dijns geslachtes quellinghe ende vernoeye: mer du heefste den valle gheholpen vore den aenscouwen sheren ons gods.

26

Ende alt volc seide dat moet waer sijn.

27

Ende doemen achior riep so quam hi. Ende iudith seide hem Die god van israhel die du oercondscap gaefste. dat hi hem wreect onder sijne vianden: hi heeft binnen deser nacht in mijn hant of ghesleghen thoeft van alden onghelouighen

28

Ende om dattu prouen mogheste dattet aldus is: sich hier holofernes hoeft die inder onwaerdicheit sijnre houaer-

[p. *153]

dicheit versmade god van israhehel: ende die dreighede dijn verderffenisse ende seide: alst volc van israhel gheuanghen sal sijn. soe sal ic dijne zijde doreboren mit enen zwaerde.

29

Ende doe achior holofernes hoeft sach soe wort hi van anxte in onmachte ende hi viel in sijn aensichte op die aerde: ende sine ziele begaffen.

30

Ende na dien dat hi weder sijnen gheest ontfaen hadde ende hi becomen was: so viele hi voer haer voete. ende aenbedese ende seide

31

Gebenedijt moetstu wesen in al iacobs woninghe dijnen god: want in allen heydenen daer men dijnen name horen sal. so salmen louen god van israhel om dij