Bible in duytsche (Delftse bijbel 1477)

§ Capittel .xij.

1

OOc dede hijse leiden daer sijne tresore laghen: ende hi beual haer daer te blijuene: ende ordineerde watmen haer gheuen soude van sijnen spijsen.

2

Ende iudith antwoerde hem ende seide. Ic en mach uv niet eten van dien dattu mij beueelste te gheuene: dat ne ghene gramscap op mi en come. Want ic sal eten van dien dat ic mit mij bracht hebbe

3

Ende holofernernes seide haer. Ofte di dit afgaet dattu mitti bracht heefste: wat sullen wij dij doen?

4

Ende indith seide Here mijn leeft dijn ziele Want dijn ioncwijf en sal al dit niet verteren vore dat god doen sal in mijne hant dat ic ghepeyst hebbe. Ende sijn knapen leidense in die tenten daer hi beuolen had:

5

ende si hiessche doe sij daer ingaen soude datmen haer vryheit gaue dat si snachtes voerden daghe wtgaen mochte te bedinghe: om den here te bedene.

6

Ende holofernes beual sijnen camerlinghen dat sij drie daghe dore also haer ghenoghen soude wtgaen ende ingaen

[p. *151]

om haren god taenbedene.

7

Ende si ghinc snachts wt in die valeye van bethulien ende si dwoech haer in die fonteyne waters.

8

Ende als si op quam. so badt si den here god van israhel dat hi haren wech betrecken wilde ter verlossinghe van haren volke.

9

Ende si ghinc in die tente ende si bleeffer suuer in. tot dat si haer spise nam tsauonts.

10

Ende het gheuiele ten vierden daghe dat holofernes maecte een auontmael sijnen knapen: ende hi seide tot vagao sijnen ghelubden camerlinc. Ganc ende gherade dien hebreuschen wijue dat si haers sdancs consentere mit mij te sijn.

11

Want onder die van syrien ist vuul als een wijf een man bespot doende: soe dat si onghenaect van hem ouerlide.

12

Ende vagao ghinc in tot iudith ende seide. Dese goede ioncfrouwe en veruare haer niet in te gaen te minen here dat si worde gheeert vore sijn aensichte: ende ete mit hem ende drincke wine in bliscepen.

13

Ende iudith antworde hem. Wie bin ic dat ic mijnen here sal weder segghen?

14

Al dat goet sal sijn voer sijn oghen ende dat alre beste sal ic doen. Want soe wat dat hem ghenoghen sal dat sal mij talre beste sijn alle die tijt mijns leuens

15

Ende si stont op ende palleerde haer mit haren clederen: ende si ghinc in ende stont vore sijn aensichte

16

Ende holofernes herte wort cloppende: want hi was barnende in hare begheerten.

17

Ende holofernes seide haer. Drincke nv ende eet mede in vroechden: want du heefste gracie voer mij vonden.

18

Ende iudith seide. Ic sal drincken here want huden is mijne ziele verheuen mere dan si in alden daghen mijns leuens was.

19

Ende si nam ende at ende dranc vore hem. dat haer bereet had haer ioncwijf

20

Ende holofernes wort vrolijc te haer waert: ende hi dranc vele wijns mere dan hijs noyt dranc binnen sijnen leuen