Bible in duytsche (Delftse bijbel 1477)

§ Capittel .xi

1

HOlofernes seide hair doe. wes wel te paeyse ende en wil dij niet ontsien in dijn herte: want ic en deerde noyt man die den coninc nabugodonosor dienen woude.

2

Want en hadde mi dijne volc niet veronwaert soe en had ic mijn spere ieghen hem niet op gheheuen

3

Ende nv seg mi om wat saken dattu van hem luden gegaen biste: waer bij di genoechde tot ons te comen

4

Ende iudith seide. Ontfanc dijn ioncwijfs woerden want ist dattu dijn ioncwijfs woerden volgheste: soe sal die here metti doen een volmaect dinc.

5

Want leuet nabugdonosor die coninc vander werlt. ende leeft sine machte in dij die inden correxien is van allen dolenden zielen: want niet allene en dienen hem die menschen bi di: mer oec sijn hem onderdane die beesten vanden ackere.

6

Want die voersienicheit dijnre stoutheit wort allen luden geboetscapt: dattu allene guet ende machtich sijtste in alle sijn rike: ende dine correxye vermaertmen in alle lantscepen.

7

Ende dat en is oec niet verholen dat achior ghesproken heeft: ende men weet oec wel wattu gheboden heefste hem

[p. *150]

te ghescien.

8

Want hets openbaer dat onse god so verbolghen is met sonden: so dat hi bi sinen propheten den volcke ontboden heeft: dat hise leueren sal om haere sonden.

9

Ende om dat die kindere van ysrahel weten dat si haren god verbolghen hebben: soe is op hem die anxte van di.

10

Hier bouen heefste die honger beuaen: van droecheden des waters. so worden sij nu gheacht onder dode lude.

11

Ende oec so ordineren si dit. dat sij haer beesten doden ende dat bloet daer of drinken:

12

ende die heilighe vaten sheren haers gods die god beuolen heeft niet te handelen. si hebben ghepeinst die te verteren. in coorne ende wijn ende olye. Ende si willen verteren dat si met den handen niet en souden genaken. Ende om dat si dit doen: so ist seker dat si in verliese sullen worden gegheuen.

13

Ende doe ic v ioncwijf dit verstont soe vloe ic van hem: ende die here heeft mi ghesonden dij dit te bootscappen.

14

Want ic dijn ioncwijf oeffene gode hier oec nv vore dij: ende dijn ioncwijf sel vte gaen. ende ic sal gode aenbeden:

15

ende hij sal mi segghen. wanneer hi hem haer sonden ghelden sal: ende ic sal comen ende segghent dij: also dat ic di leiden sal midden doer iherusalem Ende du sulste al tvolc hebben van israhel alse scape die ne ghene herde en hebben: ende ene hont en sal ieghen di niet basseu:

16

want dit is mi gheseit bi gods voersienicheit.

17

Ende om dat god op hem vergramt is: so bin ic te dij ghesonden dit te boetscappen.

18

Ende alle dese woerden ghenoechden holofernes ende sijne knapen. ende sij verwonderden van hare wijsheit: ende dene seide totten anderen

19

bouen die werlt en is dusdanen wijf niet in aensien. in schoenheden ende in besetten redenen.

20

Ende holofernes seide tot haer. God heeft wel ghedaen die dij vore tvolc ghesonden heeft ende dattuut leueren sulste in onsen handen.

21

Ende om dat dijne belofte goet is: eest dat mij dijn god doet alsoe. soe sal hij oec mijn god sijn. Ende du sulste groot wesen in nabugodonosors huys: ende dijnen naem sal worden vermaert in alle die werelt