Bible in duytsche (Delftse bijbel 1477)

§ Capittel .x.

1

DOe iudith dus haer bedinghe ghedaen had totten here: soe stont sij op vander stat daet si gheleghen had voerden here

2

Ende si riep haer ioncwijf: ende si ghinc neder in haer huys ende dede die hare wech van haer: ende si dede haer wedulic cleder wt.

3

Ende si dwoeh haer lichame. ende si besaluede haer mitter alder beste mirren. ende sij ontvlechte thaer van haren houede ende si settede haer ene crone opt hoeft: ende si clede haer mit haren ioechdeliken clederen. Ende si dede behaghelike gulden scoenen an op haer voeten: ende si nam oec an haer gulden boerden an die arme ende lilien: ende oec ringen ende vingherline ende si maecte haer behagel in al haren iuwelen

4

Ende die here gaf haer oec hier mede schoenheit: want alle dese behaghelijcheit en ghinc an haer niet om begheerten van onkuysheden: mer van duechden. Ende hier om so meerrede die here dese schoenheit soe an haer: so dat si bouen allen mensche schone schene vore alle menschen oghen

5

Ende si loet op haer ioncwijf een vlessche wijns ende een vaetken olyen ende bry ende ghesoden coelen. ende broot ende case: ende si tide wech

6

Ende doe sij comen was voren ter poorten vander stat: soe vonden si daer ontbeidende osiam. ende die papen vander stat.

7

Ende doe sijse ghesien hadden: soe verwonderden sij alte sere hare schoenheit.

8

Nochtan en vraehden sij haer niet: mer si lietense liden ende seiden Onser vader god moet di gracie geuen: ende moet mit sijnen crachte alden raet dijnre harten vast makeu: ende iherusalem moet opti verbliden. ende dijnen name moet sijn inder heiligher ende gherechtigher ghetale.

9

Ende alle die ghene die daer waren seiden mit eenre stemmen dat moet waer sijn.

10

Ende iudith leet dore die poorten den here biddende: si ende haer ioncwijf.

11

Ende het gheuiel doe si vanden berghe neder ghinc omtrent die dagheraet: soe

[p. *149]

quamen haer ieghen die van assirien verspiers: ende sij hildense ende seiden. Wanen coemstu: of werwaert gaestu.

12

Sij antwoerde. Ic bin ene dochter vanden hebreeuschen. Hier om bin ic gheuloen van haren aensichte: want ic wete dat sij uwe luden sullen worden ghegheuen in roue. om dat si v veronwaert hebben ende si haers dancs hem v luden niet en wouden op gheuen: dat sij also ontfermicheit mochten hebben vonden in uwen aenscouwen..

13

Om dese sake heb ic in mi seluen ghepeyst ende gheseit Ic sal gaen totten prince holofernes aensichte om dat ic hem segghen sal hare heimelicheit. Ende dat ic hem sal tonen mit wat toeganghe dat hijse winnen mach: also dat enen man niet vallen en sal van sijnen heere.

14

Ende doe die mannen haer woerden ghehoert hadden soe mercten si haer aensichte: ende in haer oghen was wonder: want si verwonderden sere hare schoenheit.

15

Ende si seiden tot haer. Du sulste dijne ziele behouden: om dattu dustane raet vonden hebste dattu comen woudeste tot onsen here.

16

Mer du sulste dit weten: want alstu staen sulste in sinen aenscouwen so sal hi dij wel doen: ende du sulste alte bequame sijn in sijnre harten. Ende sij leidense tot holofernes tenten: ende boetscapten dat si daer was.

17

Ende doe si incomen was voer sinen aensichte. soe wort holofernes te hant gheuanghen in sinen oghen.

18

Ende sine sarianten seiden tot hem. Wie sal veronwaerden tvolc vanden hebreeuschen die so scone wiuen hebben: dat wi niet wel met rechte. om der wiue wille ieghen hem sullen vechten.

19

Ende doe iudith holofernem sitten sach onder sijn vlyech nette dat van purpur ende van goude ende van smaragden ende met preciosen stenen ghebreit was:

20

ende sij hem int aensichte ghesien had. so viele si op die aerde ende aenbedene: ende holofernes knapen hyeuense op om dattet hem haer here hiete