Bible in duytsche (Delftse bijbel 1477)

§ Ca .ix.

1

ALs sij wech ghinghen soe ghinc iudith in hare bede camer: ende si clede haer mit eenre hare ende leide assche op haer hoeft: ende si viele neder voer den here ende riep totten here ende seide.

2

Here symeons mijns vaders god. die hem ene zwaert gaefste inden bescermene vanden vreemden luden die vercrafters waren in haren besmettinghen. ende ondecten der maecht dien in lachtere:

3

ende die hare wijue gaefste te roue. ende haer dochteren in gheuanghenissen. ende alden roef gaeftu in ghedele dijnen knechten die wraken dijnen toren: helpe mi weduwe bid ic here mijn god.

4

Want here du makes die dinghen die vore gheweest hebben: ende du peinses die ene na dandere: ende dats ghesciet dattu wouste

5

Want alle dine weghe sijn ghereet: ende dine vonnisse heefstu gheset in dijnre voersienicheit.

6

aensie nv die ghetelden van assirien. alsoestu doe ghewaerdighet taensien die ghetelde van egipten: doe sij ghewapent liepen na dijnen knechte. om dat sij betrouwen hadden in haren waghenen ende in haren gheredenen ende in die menichte van haren vechters.

7

Mer du aensagheste bouen haren castelen:: ende die donckerheiden vermoeydense.

8

Die diepheit hielt haer voete. ende twater ouerdectese.

9

Here also moeten dese worden. die betrouwen hebben in hare menichte. ende in hare waghene ende in haren scaren ende in haren schilden. ende in haren ghescutte. ende in haren speren verbliden:

10

ende si en weten niet dattu selue onse god biste die vanden beghinne die striden tonder doeste: ende here is dijn name.

11

heffe op dijnen arme alsoestu ghedaen hebste vanden beghinne: ende breke haer crachte in dijn machte. Hare crachte moet vallen in dijnre gramscap. die belouen dat sij dijn heilighen vercrachten sullen: ende besmetten dijn tabernacule dijns namen: ende dat sij mit haren zwaerde

[p. *148]

afhouwen sullen. den hornic dijns outaers Here doch:

12

dat sijn houaerde af ghesleghen moet worden mit sijns selfs zwaerde

13

Hi moet worden gheuaen mitten stricke sijnre oghen in mi: ende du sulsten verslaen mitten lippen van mijnre minnen.

14

Gheeft mi gheduricheit int herte dat icken moet veronwaerden: ende sine macht: dat icken omwerpen mach

15

Want het sal een ghedeincken sijn dijns namen: als hem eens wijfs hant ter neder sal gheworpen hebben

16

Want here dijne machte en is in menichte niet: noch dine wille in crachte van paerden. Noch die houaerdighe en hebben di niet genoecht vanden beginne: mer der oetmoedigher ende der sachtmoediger bedinge hebben dij altoes ghenoecht.

17

God der hemelen. ende scepper der watere. ende here van allen creaturen. ghehore mi cattiuighe biddende: ende die ghetrouwen hebben op dijne ontfermherticheit.

18

Here ghedencke dijns testaments. ende ghif woert in mijnen mont. ende make raet vaste in mijn herte: so dat dijn huys in heilicheit gheduren moet:

19

ende dat alle heidene bekennen moeten dattu god biste ende dat ne ghene ander en is