Bible in duytsche (Delftse bijbel 1477)

§ Capittel .viij.

1

HEt gheuiel doe dese woerden gehoert hadde die weduwe indith. die merai dochter was. ydocx soons yosephs soens ozyas soens elay soens iamnor soens gedeons soens. raphoims soens achitobs soens melchias soens. enams soens nathanias soens salachiels soens symeons soens die rubens sone was

2

ende manasses was haer man. die inden daghe vanden gherstenen oeste starf

3

Want hi was onledich mitten genen die schoue bonden inden acker ende ene hette quam hem opt hoeft: ende hi starf in betulia sijn stat ende hi is daer begrauen mit sijnen vaderen.

4

Ende iudith sijn wijf die achter bleuen was. was wedue drie iaer ende ses maent.

5

Ende bouen haer huys so makedze te haren behoef ene heimelike slaepkamere ende daer in hielt si haer ghesloten mit haren ioncfrouwen:

6

ende si had ouer haer lendene ene hare. ende si vastede alle die daghe haers leuens: sonder die saterdach ende die neomenien. ende die

[p. *146]

feesten des huys van israhel.

7

Want si was van sere bequameliken aenscouwen: ende haer man had haer ghelaten vele guets ende grote meysniede: ende possessien van coeyen van cudden van scapen.

8

Ende dese was in allen alte sere vermaert. want si ontsach sere gode: ende niemant en was die een quaet woert van haer sprac.

9

Ende doe dese dus ghehoert hadde dat ozias gheloeft had dat hi als vijf daghe leden souden sijn. die stat op gheuen soude: soe sant sij totten papen chabri ende charim.

10

Ende si quamen te haer: ende si seide hem. Wat woerde is dit dat ozias v gheconsenteert heeft. dat hi die stat die van assirien op gheuen sal: op dat ons binnen vijf daghe ghene hulpe en coemt?

11

Ende wie sij dij die den here becoort?

12

Dit en is ne ghene redene die ontfermicheit toe breinct: mer si porret bet gramscap. ende si ontsteect toren.

13

Ghi hebt tijt gheset van ons heren ontfermicheden: ende na uwen wille hebdi hem dach gheset.

14

Mer om dat die here ghedoechsaem is. Laet ons hier af betrouwenisse hebben: ende bidden hem wij mit tranen dat hijt ons vergheue

15

Want god en salmen niet dreighen als ene mensche: noch hi en sal ter gramscap niet ontsteken worden als eens menschen soen.

16

Ende daer om laet ons den here onse zielen veroetmoedighen:

17

ende laet ons hem dienen in bedroefden oetmoedighen gheest: ende segghen wij den here al wenende. dat hi na sinen wille al so met ons moet doen ghering sine ontfermicheit: ende ghelijc dat onse herte veruaert is in haere houaerden. alsoe dat wi oec van onser oetmoedicheit moeten worden verblijt:

18

want wi en sijn niet geuolghet onser vadere sonden die haren god lieten: ende aenbeden vreemde goden:

19

om welke misdaet si ghegheuen worden int zwaert. ende in roef. ende in lachtere haren vianden. Mer wi en weten ne ghenen anderen god sonder hem.

20

Laet ons oetmoedelijc ontbeiden sijnen troest ende hi sal ons bloet versoeken van onser vianden quellinghen: ende hi sal alle die heydenen veroetmoedighen die op risen ieghen ons: ende die here onse god salse maken sonder eere.

21

Ende nv ghi broedere die papen sijt in gods volke. ende an v luden hanghet haer ziele: beleyt haer harten mit uwen woerden: dat si ghedencken dat onse uadere ghetempteert waren. op dat si souden worden gheproeft of si waerlijc haren god oeffenden.

22

Sij sijn sculdich te ghedencken hoe abraham onse vader ghetempteert was: ende als hi bi vele vernoyen geproeft was. so wort hi gods vrient

23

Also ysaac. ende iacob. ende moyses: ende alle die gode bequaem hebben gheweest. sijn aldus ouerleden ghetrouwe mit vele vernoyen.

24

Want die ghene die ne ghene temptacie ontfaen en hebben mit sheren vresen. ende die ieghen gode daden hare onghedoechsaemheit ende die lachter haerre murmuracien.

25

sij worden verderft vanden verderuere: ende verloren vanden serpenten.

26

Ende daer om en laet ons. ons seluen niet wreken van dien dat wij ghedoghen:

27

mer laet ons micken dat dese pijnen

[p. *147]

die wij doghen mindere sijn dan die wij mit onsen sonden verdient hebben: ende laet ons ghelouen als knechte die ghecastijt worden dat sheren gheselinghen op ons comen sijn niet te onsen verliesen mer om dat wij ons beteren sullen.

28

Ende ozias die pape seide haer Al dattu ghesproken heefste is waer: ende ne ghenen begrijp en is in dijnen woerden.

29

Nu daer om bidde ouer ons want du biste een heilich wijf. gode ontsiende.

30

Ende iudith seide hem. Also ghi bekent dattet gode toebehoert dat ic ghesproken hebbe:

31

also proeft oft van gode is dat ic ghemict heb te doen: ende bid dat god minen raet vastmaken moet

32

Ghi sult te nacht ter poorten staen: ende ic salre wtgaen mit mijnen ioncwijue ende bid dat die here in vijf daghen also ghi gheseit hebt sijn volc van israhel ansien moet.

33

Mer ic en wil niet dat ghi ondersoect dat ic doen sal: ende tot diere tijt dat ic v weder boetscappen sal. so en salmen el niet doen dan ouer mi bidden den here onsen god.

34

Ende ozias die prince van iuda seide tot haer. Ganc in paeyse: ende die here moet mitti wesen ter wraken van onsen vianden. Ende si kereden weder ende ghinghen henen