Bible in duytsche (Delftse bijbel 1477)

§ Capit .xvi

1

IUdith sanc doe den here dit lyedekijn ende seide.

2

Singhet den here in tamburen. ende singhet den here in cimbalen. singhet hem enen nyewen lof: verblijt ende aenroept sijnen name

3

Die here die de stride verteert. die here is sine name.

4

Die sijn ghetelde sette in midden sijnen volken: om dat hi ons verlossen soude van onser vianden hant.

5

Assur quam van noorden vten berghen inder menichte sijnre starcheit ende sijn menichte bestopten die scietende riuieren: ende haer paerden ouerdecten die valeyen.

6

Ende hi seide dat hi mijn lant verbarnen soude. ende mijn ionghelinghe doden mitten zwaerde: ende dat hi mijne kindere soude gheuen te roue: ende die maechden in gheuanghenissen.

7

Mer die almachtighe here deerde hem: ende leuerden in eens wijfs hant: ende sij verscheiden.

8

Want haer machtighe en viele niet vanden ionghelinghen. noch tytans sone en sloghene. Noch die langhe gyganten en setten hem ieghen hem niet: mer iudith merai dochter nam hem sijn machte in die schoenheit van haren aensichte.

9

Want sij dede haer weduwelic cleet wt: ende si clede haer mit enen clede der vroechden in blijscap inder kindere van israhel blijscap.

10

Si saluede haer aensichte mit saluen ende si vergaderde hair haer mit eenre cronen om dat sine bedrieghen soude.

11

Haer vergulden scoenen begrepen sijn oghen: ende haer schoenheit vinc sijn zyele: ende sij sloech sijnen necke af mit enen zwaerde.

12

Die van persen vreesden hare vromicheit: ende die van meden hare coenheit.

13

Doe huylden die tenten van assirien als mine oetmoedighe openbaerden: verdroghende van dorste

14

Der ioncfrouwen kindere doerstakense: ende si sloegense doot als kindere die vlouwen: si vergingen inden strijde van mijns heren aensichte.

15

Singhen wij den here lof: singen wi onsen gode nyewen lof.

16

Adonay here. du biste groot ende voerbarich in machte: ende die nieman verwinnen en mach:

17

Alle dine creaturen moeten dij dienen. want du seides ende si worden ghemaect. du sondste dijnen gheest ende sij worden ghescepen: ende nieman en is die dijne woerde mach verstaen.

18

Die berghen sullen worden beruert ende hare fundamenten mitten wateren: ende die stenen sullen smelten voer dijn aensichte als was.

19

Mer die dij ontsyen: sij sullen voer dij in allen dinghen groet wesen.

20

Wee den heydenen die opstaen ieghen mijn gheslachte. Want dalmachtighe here sal wreken ieghen hem: ende in doemsdaghe sal hijse vysiteren.

21

Want hi sal gheuen vuer ende worme in haer vleysche: om dat sij barnen sullen ende gheuoelent eweliken.

22

Hier na gheuiele dat alt volc nader victorien quam te iherusalem den here te aenbedene: ende na dien dat si ghesuuert waren soe offerden si alle holocauste. ende dat sij geloeft hadden ende haer danckelike offerhande.

23

Ende iudith offerde alle holofernes ghesmide van wapenen die haer tvolc gauen. ende dat vlieghenette dat si mit haer ouerghedraghen hadde in

[p. *156]

een verghiften der verghetenheit.

24

Ende tvolc was blijde nader heiligher aensichte: ende drie maent lanc so vieremen die blijscap van deser victorien met iudith.

25

Mer na dien daghe so keerde elc weder te sijnen: ende iudith wort verheuen in betulia: ende si was die voerbarichste van alden lande van israhel.

26

Want mit hare doecht soe had si suuerheit: so dat sine ghene man en bekende binnen alle die daghe haers leuens: van dier tijt dat manasses haer man starf

27

Want inden feesteliken daghen quam si wt mit groter glorien.

28

Ende si woende in haers mans huys hondert iaer ende wijf ende si liet haer ioncwijf vri: ende si starf ende is begrauen mit haren man in betulia:

29

ende al tvolc beweendese seuen daghe.

30

Mer binnen allen den tiden van haren leuen so en was niemant die israhel verstoerde noch in vele iare na hare doot.

31

Ende die dach van deser victorien. wort vanden hebreeuschen ontfaen in vierten inden ghetale vanden heilighen daghen:: ende die ioden oeffenen van diere tijt tot in desen daghe.

§ Hier gaet iudiths boec wt.