Bible in duytsche (Delftse bijbel 1477)

§ Capit .vi.

1

ENde het gheuiele doe sij haer spreken lieten: so wort holofernes sere vergramt ende hi seide tot achior.

2

Om dattu ons ghepropheteert hebste ende gheseit dat tvolc van israhel wort beschermt van sijnen gode: op dat ic di to-

[p. *143]

nen sal dat ne ghenen god en is sonder nabugodonosor:

3

als wijse alle sullen hebben verslaghen als enen man. dan suldi oec mit hem steruen in diere van assirien zwaert: ende al israhel sal mitti verderft worden:

4

ende du sulste prouen dat nabugodonosor here is van alder werelt. Ende dan sal tswaert mijns ridderscaps liden dore dijn zijden: ende dore steken sulstu vallen onder die ghewonde van israhel: ende en du en sulste nemmermere herademen vore dattu sulste verderuen mit hem.

5

Mer ist dattu waenste dat dine prophecie waer sijn sal. so en laet dijn aensichte niet nederwaert vallen: ende die bleecheit die in dijn aensichte is. gae wech van di: ist dattu waenste dat dese mijn woerden niet en sullen moghen voldaen worden.

6

Mer om dattu weten sulste dattu dit mit hem gedoghen sulste: van deser vren. ziet so suldi den volke worden gheleuert: dats als si die verdiente der pinen van mijnen zwaerde ontfaen sullen. dattu oeck mit hem onder mijn wrake wesen sulste.

7

Doe beual holofernes sijnen knapen: dat si achior nemen souden ende leiden in betulia: ende dat sijne leueren souden inder kinder van israhels handen.

8

Ende holofernes knapen namene ende tiden darwaert dore die campaendien: mer doe sij den montangien naecten. soe quamen die slinghers wt ieghen hem

9

Ende doe keerde si nederwaert an die zide vanden berghe. ende si bonden achior aen enen bome mit handen ende mit voeten: ende si lieten also ghebonden mit coerden: ende si keerden weder tot haren here.

10

Ende die kinder van israhel die van betulia neder quamen: si quamen te hem. Ende si ontbondene ende leiden in betulia: ende si setten in midden tvolc ende vraechden hem. wattet bedude datten die van assirien so ghebonden hadden ghelaten.

11

In dien daghen worden daer dese princen. ozias micha soon van symeons gheslachte: ende charmi die oec gothoniel hiet.

12

Dus seide achior in midden den ouders ende vore hem allen alle dat hi gheseit had. doe hem holofernes vraechde: ende hoe datten holofernes volc om dit woort dootslaen woude:

13

ende hoe holofernes van gramscepen beual datmen hier om den volke van israhel leueren soude: ende als hij die kindere van israhel verwonnen hadde. dat hi dan oech achior soude beuelen te doden mit menighen tormenten: om dat hi gheseit had. god des hemels is haer beschermer

14

Ende als achior al gheseit hadde wt: so vielen alle tvolc op sijn aensichte ende aenbeden den here: ende mit ghemenen ghewene ende ghescreye soe stortten si eendrachteliken haer bedinghe

15

ende seiden. Here god des hemels ende der aerden aensich hare houaerde ende aenscouwe onse oetmoedicheit. ende merke dijnre heylighen aensichte: ende thone dattu niet en laetste die ghene die hem opti verlaten: ende dattu vernederste die ghene die hem op haer seluen verlaten ende op hare crachte.

16

Ende doe tghewene ghedaen was: ende alden dach dore des volcs bedinghe ghedaen was: soe vertroesten si achior

17

ende seiden. Onser vader god

[p. *144]

wies crachte dattu vertelt hebste. hij sal di desen loon gheuen: dattu meer haerre verderuen sulste sien.

18

Ende als die here onsen god sijnen knechten dese vrijtheit ghegheuen heeft: soe sal hij mitti god oec wesen int midden ons: soe dattu onder ons oec wonen sulste mit al dien datti toebehoert.

19

Ende als die raet ghedaen was soe ontfincken ozias in sijn huys: ende maecte enen groten auontmale.

20

Ende hi riep alle die papen. ende als si haer vasten voldaen hadden so aten si te gadere.

21

Ende daer na so vergaderde al tvolc: ende si beden alden nachte dore inder vergaderinghen: ende biddende hulpe van gode van israhel