Bible in duytsche (Delftse bijbel 1477)

§ Ca .iiij.

1

. DOe dit die kinder van israhel hoerden die woenden int lant van iudea: so ontslaghen si hem sere van sijnen aensichte

2

Ende dese anxte ende vrese viel in haren sinne: dat hi dat doen soude an iherusalem ende an sheren tempel. Also hi ghedaen hadde der andere steden ende haer templen.

3

Ende sij senden in al samarien al om ende omme tot iherico: ende sij besetten al die toppen vanden berghen.

4

Ende si beloken haer weghen mit muren: ende si vergaderden coorne om hem te ghereidene te striden.

5

Ende die pape heliachim screef tot alden ghenen die ieghen esdrelon waren. die ieghen daensichte vander groter ackere is ende neuen dotaim: ende hem allen daermen liden mochte:

6

dat si besetten souden die opganghe vanden berghen daer enich wech sijn mochte te iherusalem waert: ende si daer wachten souden soe waer dat nauwe wech mochte wesen tusschen den berghen.

7

Ende die kinder van israhel deden: also hem heliachim sheren pape beuolen had.

8

Ende al tvolc riep totten here mit groter arenste: ende sij veroetmoedichden haer zielen in vasten. si ende haer wijuen.

9

Ende die papen cleden hem mit hare:ende si leiden die kinder ieghen taensichte van sheren temple: ende si ouerdecten sheren outare mit eenre hare.

10

Ende si riepen eendrachtelijc totten here god van israhel: dat hare kinder niet en mosten ghegheuen worden in roue. noch haer wijue in deilinghe. noch haer stede te vallen. noch haer heilighen in besmittinghe: ende dat si niet en mosten worden den heydenen te lachtere.

11

Heliachim sheren groten pape toech doe al om ende omme israhel: ende hi sprac den volke toe

12

ende hi seide. Ghi sult weten dattie here uwe bedinghe horen sal: op dat ghi ghedurich blijft in sheren aenscouwen in vasten ende in bedinghen.

13

Ende ghi sult ghedeincken moyses ons heren knechte: die amelech die betrouwen had in sijn machte ende sijn crachte ende in sijn heere. ende in sijn scilde ende in sijnen waghenen ende in sijnen gheredenen verdreef niet vechtende mit

[p. *141]

ysere: mer mit heilighe bedinghe bedende.

14

Aldus sullen alle israhels vianden te neder gheslaghen worden op dat ghi gheduert in desen werke dat ghi begonnen hebt.

15

Bi desen goeden rade die hi hem gaf so bleuen si ghedurich in bedinghen in sheren aenscouwene:

16

ia dat die ghene die holocaust den here offerden. waren bouen ghecleet mit haren den here offerende sacrificie: ende asschen laghen hem opt hoeft.

17

Ende alle baden si mit allen haren herten gode: dat hij sijn volc van ysrahel visyteren soude