Bible in duytsche (Delftse bijbel 1477)

§ Capit .iij

1

COninghen ende princen van allen poorten ende van allen prouincien dats van syrien. ende van mesopothamien. ende van sobals syrien. ende van libien. ende van cylicien: sonden doe haer messagiers: ende die quamen tot holofarnem ende seiden

2

Laet lijden dijn gramscap omtrent ons Want het is beter dat wi leuende dienen nabugodonosor den groten coninc. ende dat wi di onderdaen sijn: dan dat wi steruen ende dan ghedoghen den scade van onsen dienste. mit onser verderfnissen.

3

Want alle onse stede ende alle onse goet. ende onse. houele ende alle berghe. ende den ackeren. ende onse quic vanden coeyen. ende den quic van onsen scapen. ende gheiten ende kemels ende van paerden ende al onse goet ende onse mesnieden sijn in dijne aenscouwene.

4

Dese sijn al onder dijn wet.

5

Wij oec ende onse kinderen. sijn dijn dienstluden

6

Com ons ene ghemackelijc here: ende ghebruke ons dienstes also di ghenoghe.

7

Doe toech hi neder vanden berghen mitten gheredenen. ende mit grooten crachte: ende hi wan al die steden ende al die int lant woenden.

8

Ende wt allen steden

[p. *140]

nam hi salcoers mit hem starcke mannen ende wtghecoren ten strijde.

9

Ende dien lantscepen quam soe groten anxte an: dat alle princen ende die eersame luden van allen steden metten volc wt toghen hem te ghemoet daer hij quam.

10

ende ontfinghenen mit cronen ende mit lichte: ende leiden reyne mit harpen ende tambueren.

11

Nochtan dat si dit daden so en mochten si niet ghesachten die wreetheit sijnre harten.

12

Want hij destrueerde haer stede: ende hiewe haer bussche af.

13

Want die coninc nabugonosor hadt hem beuolen. dat hij alle die gode van aertrike breken soude: om dat hi allene soude worden god gheheten van alle den ghenen die mit holofernes macht soude worden tonderbracht.

14

Ende hi leet dore sabals syrien ende dore al apamiam. ende dore al mesopothamiam ende hi quam in ydumeo int lant van gabaa:

15

ende hi ontfinc haer steden. ende bleef daer dertich daghe legghende: ende in desen daghe beual hi te vergaderen alt heere van sijnre machte