Bible in duytsche (Delftse bijbel 1477)

§ Capittel .ij.

1

IN nabugodonosor sconincs dertienste iaer. opten twe ende twintich dach vander eerster maent. soe wort een woert ghemaect in nabugosors sconincs van assirien huys: dat hi hem bescudden soude.

2

Ende riep alle die meeste van gheboerten ende al die princen ende sijn vechters: di hi hadde mit hem ende die heymelijcheit van sinen rade

3

Ende hi seide dat sijne ghepeins in hem was: dat hi alle aertrike hem tonderdoen soude.

4

Ende doe hem allen dit woert ghenoechde: soe riep die coninc nabugodonosor holofernem den maerscalc van sinen ridderscepe:

5

ende hi seide hem Trect vte ieghen al trike van oesten: ende sonderlinghe ieghen die ghene die mijn ghebot verouwaert hebben.

6

Dijn

[p. *139]

oghen en sal ne ghene rijc sparen: ende du sulste elke ghemuerde stat mi tonder doen.

7

Holofernem riep doe die princen ende die meesters van diere van assirien crachte: ende hi telder mannen vte te sinen salcoerse also hem die coninc beual hondert dusent ende twintich dusent man vechters te voete: ende scutters te paerde twaelf dusent.

8

Ende hi dede alle sine vitalie dore gaen in een menichte van ouertallygen kemeels. die drogen ouertallichlijc datten heere besich sijn soude ende quic van coeyen. ende cudden van scapen. daer ne ghene ghetal an en was.

9

Ende hi beual wt al syrien coorne te gereiden aldaer hi lyden soude.

10

Ende hi nam van sconincs huse seer vele gouts ende siluers.

11

Ende hi toech vte ende al theer. met waghenen ende gheredenen ende met scutters: ende si ouerdecten al tlant als spelthanen

12

Ende doe hi leden was teynde van assyrien soe quam hi totten groten berghe van ange die ten slinkerside van cilicien sijn: ende hi ghinc op al haer borghe: ende hi wan elke vaste stat

13

Ende hi destrueerde die voerbarighe stat melothi: ende hi roefde alle die kindere van tharsis. ende ismahels kinderen die iegen daensichte vander wildernissen waren. ende ten suden slants van celeon.

14

Ende hi toech ouer eufraten. ende hi quam in mesopothamien ende hi brac alle die hoge steden die daer waren vander vluet mambre tot dat men totter zee coemt:

15

ende hi becommerde die termine van dien lande van cilicien tot die einden van iaphet. die ten zuden waert sijn.

16

ende hi voerde alle die kinder van madian wech. ende hi roefde alle haer rijcheden: ende alle die ghene die ieghen hem staken die dode hi int swaerts mont.

17

Ende hier na toech hi neder inden velde van damasco inden daghe vanden oeste ende hi verbarnede alle die vruchte: ende alle die bome ende die wijngaerde dede hij afhouwen:

18

ende sijn vrese viel op alle die ghene die in dien lande woonden