Bible in duytsche (Delftse bijbel 1477)

§ Ca .I.

1

ARphaxat die coninc van meden hadde vele luden sijn rijke tonder ghedaen ende hi stichte ene alte machtighen stat di hi hiete egbatanis.

2

Hi maecte van ghehouwen viercanten stenen haer mure: tseuentich cubitus hoghe ende dertich cubitus wijt: mer haer toernen maecte hi hondert cubitus hoghe.

3

Ende viercante so was elke zide vanden toornen twintich voeten wijt. Ende hi maecte die poorten vander stat also hoghe als die toornen.

4

Ende hi verhief hem al in der machte van sinen heere: ende inder glorien van sinen gheredenen.

5

ende nabugodonosor die coninc van assierien die regneerde in niniue die grote stat hij vacht ieghen arphaxat: inden twaelfsten iare van sijnen rike: ende hi verwannen

6

opt grote velt datmen hiet regau. tusschen eufraten ende tygrin. ende iadason in erioch sconincs van elken velde.

7

Doe wort nabugodonosors rijke verheuen: ende sijn harte verhouerde hare. Ende hi sant tot alden ghenen die woonden in cilicien. ende in damasco. ende in libano.

8

ende totten heydenen die waren in carmelo ende in cedar. ende die in galilea woenden. ende in die grote ackere esdrelon:

9

ende tot alden ghenen die waren in samarien. ende ouer die riuiere vander ioerdanen. tot iherusalem. ende tot alden landen van iessen. tot datmen coemt totten berghen van ethiophen.

10

Tot alle dese sant nabuchodonosor. die coninc van assirien boden:

11

ende si weder seidenen al. ende sonden die boden weder ydel. ende verdreuense sonder ere.

12

Doe wort die coninc nabugodonosor verbolghen op alle dese lande. ende swoer bi sijnen rike ende bi sijnen trone dat hi hem bescudden soude van allen desen lantscepen