Bible in duytsche (Delftse bijbel 1477)

§ Capittel .xiij.

1

ENde die oude tobias ondede sijnen mont: ende gebenedide den here ende seide. Here du biste groot ewelijc ende dijn rijc is ewelijc ende emmermere:

2

want ghi gheeselt ende du verlosses. du leides ter hellen ende du breincste weder: ende niemant en is die dijnre hant ontulien mach.

3

Kindere van israhel belyet den here. ende inder heiden aenscouwen loeften:

4

want hier om heeft hi v ghestroeyt onder die heidene dien niet en kennen. om dat ghi sijn wonderen vertellen sult: ende ghi sult hem doen weten dat el ghene anderen god almachtich en is sonder hi.

5

Hi heeft ons ghecastijt om onse quaetheden: ende hi sal ons verlossen om sijne ontfermherticheit.

6

Hier om besiet wat hi ghedaen heeft mit v ende mit vresen ende mit beuen. beliet hem ende verheft den coninc vanden werelden in uwen werken.

7

Want ic sal hem belien inden lande mijnre gheuancnisse: want hi heuet sijn moghentheit ghetoent in sijn sondelijc volc.

8

Hier om so wort bekeert ghi sondaren. ende doet gherechtelijc voerden here: ende gheloeft dat hij met v sine ontfermherticheit doen sal.

9

Want ic ende mine ziele sullen in hem verblijden.

10

Alle gods vercoren benedijt hem: duet daghe van blijscappen: ende belyet hem.

11

Iherusalem gods stat: die here heeft di ghecastiet inden werken van dinen handen.

12

Beliet den here in dijn gueden ende benedijt gode vanden werelden: dat hi in dij verstichten moet sine voninghe. ende dat hi weder te di vergaderen moet alle die gheuanghene: ende du mogheste verblijden ewelijc ende emmermere.

13

Du sulste blincken mit blinckende lichte: ende alle die eynden vanden werelt sullen dij aenbeden.

14

Die nacien sullen van verre te dij comen: ende si sullen ghiften bren-

[p. *137]

ghen ende den here in di aenbeden: sij sullen dijn lant hebben in heilicheden.

15

Want si sullen den groten name daer in aenbeden.

16

Die di versmaden sullen si sullen sijn vermaledijt: ende alle die blasfemeren sullen in di seluen worden verdoemt: die di stichten sullen si sullen wesen ghebenedijt.

17

Want du sulste worden verblijt in dijnen kinderen: want sij sullen al worden ghebenedijt. ende worden ten here vergadert

18

Si sijn alle salich die di minnen: ende die verblijden op dijnen paeys.

19

Mijn ziele ghebenedide den here: want hi heeft iherusalem sijn stat verlost.

20

Ic sal salich wesen: op dat ouerblijuen van minen sade si sullen sijn om te sien die claerheit van iherusalem.

21

Die poorten van iherusalem sullen worden ghesticht van saphieren ende smaragden: ende alle den ommeganc van haren muren van preciosen stenen.

22

Alle haer straten sullen ghepaueert worden van witten ende reyne stenen: ende in haren weghen salmen alleluya singhen

23

Ghebenedijt si di here diese verheuen heeft: op dat sijn rijc op haer sal sijn ewelijc ende emmermere amen.