Bible in duytsche (Delftse bijbel 1477)

§ Ca .xiiij.

1

ALle tobias sermonen woerden voldaen. Ende na dien dat hi weder siende wort so leefde hi twe ende veertich iaren: ende hi sach sijnre neuen sonen

2

Ende doe hi hondert iaer ende twe voldaen had so wort hi eerlijc begrauen in niniue.

3

Want doe hi sijn lichte verloes so was hi ses ende vijftich iaer out: ende doe hi tsestich iaer had so ontfinc hijt weder.

4

Ende dandere van sijnen leuen was in blijscepen: ende mit gueden voerganghe van sheren vrese so voere hi henen in paeyse.

5

Mer in die vre sijnre doot riep hi tot hem tobiam sijnen soon. ende seuen ionghelinghen sinen sonen sijn neuen: ende hi seide hem.

6

Tuerderuen van niniue is bij. Want gods woert en sal niet achter bliuen: ende onse broederen die ghestroeyt sijn vanden lande van israhel. si sullenre weder toe keren

7

Want al haer verwoest lant sal veruolt worden: ende men sal wederstichten. gods huys datter in verbrant is: ende daer sullen wederkeren alle die gode ontsien.

8

Ende die heydenen sullen haer afgoden laten: ende si sullen comen in iherusalem. ende wonen daer in:

9

ende si sullenre in verblijden alle die coninghen der aerden. ende den coninc van israhel aenbeden.

10

Daer om hoort ghi mijn sonen. uwen vader Dient den here in waerheden: ende ondersoect om te doen dat hem ghenoechlijc is.

11

Ende beueelt uwen kinderen. dat si gherechtelijc doen ende aelmoessenen: ende dat sij gods ghedencken: ende sij hem in allen tiden louen in waerheden ende in alle hare machte.

12

Nu sonen hoert mi daer om: ende en wilt hier niet bliuen. Mer in so wat daghen dat ghy uwe moeder sult hebben begrauen. neuen mi in een graue: van dier tijt bereit uwen wech van henen te gaen.

13

Want ic sie: dat die quaetheit van niniue haer einde gheuen sal.

14

Ende het gheschiede na der moeder doot. dat tobias wech ghinc van niniue met sijnen wijue mit sijnen sonen ende kijns kinderen: ende hij keerde weder te sijnen sweere ende swegher.

15

Ende hi vantse ghesont ende in goeder outheit: ende

[p. *138]

hi nam om hem ware. ende hi loke haer oghen: ende hij ontfinc alle erfachticheit van raguels huys: ende hi sach sijn vijfte gheslachte sijnre sonen kinderen.

16

Ende doe hi veruolt had neghen ende tneghentich iaer in sheren vresen soe begrouen sine mit blijscepen.

17

Ende alle sijn maechscippe ende alle sijn gheslachte bleef in goeden leuen ende in heiligher wandelinghen: also dat si bequaem waren gode ende den menschen: ende hem allen die int lant woenden.

§ Hier eyndet tobias