Bible in duytsche (Delftse bijbel 1477)

§ Ca .xi

1

ENde doe sij wederkeerden: so quamen si in midden charran dat in midden den wech is teghen niniue ten elften daghe.

2

Ende dinghel seide. Tobias broeder. Weetstu hoeftu dinen vader lietste.

3

Eest dattet di genoghet so laet ons vore gaen: ende die meysmiede sullen te gader mit dijnen wiue. ende mit dijnen beesten al leincken nauolghen onsen wech.

4

Ende doe hem dat ghenoechde dat sy gaen souden: so seide raphael tot tobiam. Neem mitti vander gallen vanden vissche: want het sal notorftich wesen. Dus droech tobias van dier gallen: ende si ghinghen wech.

5

Ende anna sat daghelijcs neuen den wech opten toppe van enen berghe: van daer si verre sien mochte.

6

Ende doe sij van dier seluer stat sach of hi quam: soe sach si van verren ende si bekende ter stondt dat haer soon quam: ende si liep ende boetscaptet haren man ende seide Sich dijn soon coemt.

7

Ende raphael seide tot tobiam. Daer du in dijn huys comen sulste. so aenbede te hant den heer dijnen god: ende danct hem. ende ganc tot dijnen vader: ende cusse hem.

8

Ende te hant salue op sijn oghen van deser gallen van den vissche. dies du mitti dragheste Want du sulste weten dat sine oghen te hant sullen worden ontdaen: ende dijn vader sal sien tlicht des hemels ende hi sal verbliden in dijnen aensien.

9

Doe liep die hont vore die mede was inden wech: ende ghelijc enen toecomende bode soe verblijde hij sijnen staert queckende.

10

Ende die blinde vader stont

[p. *135]

op. ende begonste te lopen sinen voet stotende: ende hi gaf enen kinde die hant. ende hi ghinc sijnen sone te ghemoete.

11

Ende hi ontfincken ende custen mit sijnen wiue: ende si begonsten beide te wenen van bliscappen.

12

Ende doe si gode aenbeet hadden. ende ghedanct: so saten si te gader neder.

13

Doe nam tobias vander gallen vanden vissche. ende saluede sijnen vader die oghen.

14

Ende hi ontbeide wel na ene halue vre: ende vte sinen oghen begonste twitte te comen ghelijc den vliese van enen eye.

15

Ende tobias begreepse ende toechse wt sijns vaders oghen: ende te hant ontfinc tobias sijn sien.

16

Ende sij loefden gode hi ende sijn wijf: ende alle dien kenden.

17

Ende tobias seide. Here god van israhel ic loue dij want du heueste mi ghecastijt: ende du heueste mij ghenesen. Ende sich ic sye tobiam mijnen soen.

18

Ende na seuen daghe so quam oec sara sijns soens wijf. ende alle die maeysnieden ende quicke ghesont: ende die kemels ende vele ghelts sijns wijfs: mer oec tghelt dat hi ontfaen had van gabele

19

Ende tobias vertelde vader ende moeder alle gods weldaden: die hij mit hem ghedaen had bi dien man dien gheleit had:

20

ende athior ende nabath tobias maghen quamen. verblidende tot tobiam ende verbliden mit hem van alden goede dat god omtrent hem ghetoent had.

21

Ende sij werscapten seuen daghen ende verbliden alle mit groter bliscappen