Bible in duytsche (Delftse bijbel 1477)

§ Capit .x.

1

MAr doe tobias daer marrede om die sake van der brulocht: so was tobias sijn vader in sorghen ende seide Waer om waenstu dat mijn sone merret: ofte waer om dat hi ghehouden is?

2

Waenstu dat gabelus doot is. ende dat hem nyemant ghelt en gheuet?

3

Ende hi begonste sere te bedrouen ende anna sijn wijf mit hem: ende si begonsten beide te wenen: om dat haer sone ten ghesetten daghe te hem niet weder en keerde.

4

Dus weende sijn moeder mit tranen sonder op houden: ende seide. Ay mi sone mijn. Waer om senden wi di in pelgrimagien. tlicht van onsen oghen. ende die stoc van onser outheit: tsolaes ons leuens. die hope onser nacomelinghe

[p. *134]

5

Om dat wi alle dinc te gader in di allene hadden: soe en souden wi dij niet hebben laten gaen van ons.

6

Ende tobias seide. Swijch. en wil niet worden ghestoert: onse zone is ghesont: dien man daer wijne mede ghesonden hebben is ghetrouwe ghenoech.

7

Mer sij en mochte in gheenre manieren worden ghetroest mer si spranc alle daghe op ende sach al om. ende ghinc al die weghe al om. al daer si hope hadde dat hi comen soude: dat sine van verre soude sien comen ofte si mohcte.

8

Ende raguel seide tot sinen behuweden sone. Blijf hier: ende ic sal senden tot dijnen vader enen bode der salicheit van dij.

9

Ende tobias seide hem. Ic weet dat mijn vader ende mijn moeder nv die daghen tellen ende dat haer gheest in hem ghepinet wort.

10

Ende doe raguel tobiam bat mit vele woerden. ende hijt met gheenre reden horen en wilde: so leuerde hi hem saram ende die helfte van sijnen goede. in knapen. in ioncwiuen. in quicke. in kemels. ende in coeye ende in vele ghelts: ende hi lieten van hem gaen gesont ende blyde

11

ende seide. Gods heilich enghel moet wesen in uwen weghen: ende hi moet v ghesont beleiden. ende ghi moet alle dinc voerspoedelijc vinden omtrent uwen vader ende moeder: ende mine oghen moeten uwe kinderen sien eer ic steruen sal.

12

Ende vader ende moeder namen hare dochter. ende custense. ende lietense gaen:

13

ende beualen haer dat sij eren soude zweere ende zwegher. ende haren man minnen. ende haer huysluden regeren. ende thuys berechten: ende dat si haer seluen houden soude sonder begrijp