Bible in duytsche (Delftse bijbel 1477)

§ Capittel .ix.

1

DOe riep tobias den enghel te hem dien hi waende dat een mensche had gheweest: ende hi seide. Azarias broeder ic bidde dattu mijn woerden horen wilste.

2

Al waert dat ic mi seluen di te enen knechte leuerde: so en sal ic niet waerdich wesen dijnre voersienicheit.

3

nochtan soe bid ic di dattu mitti neemste beeste of dienst knechte ende ganc tot gabele in rages die stede van meden: ende leuer hem sijn cyrographe: ende ontfanc tghelt van hem. ende bidde hem dat hi come te mijnre brulochte.

4

Want du weetste wel dat mine vader die daghe telt: ende ist dat ic enen dach langher merren sal. soe sal sijne ziele worden bedroeft.

5

Ende oec siestu hoe mij raguel besworen heeft: wies bezweren ic niet veronwaerden en mach.

6

Doe nam raphael vier van raguels knapen ende twee kemels. ende toech in rages die stede van meden: ende hi vant gabele ende hi gaf hem sine cyrographe: ende hi ontfinc van hem alt ghelt.

7

Ende hi seide hem van tobia tobias soon al datter ghedaen was: ende hi deden mit hem comen ter brulocht.

8

Ende doe hi in raguels huys comen was. so vant hi tobiam sitten etende: ende hi spranc op ende si custen dene dander. Ende gabelus weende: ende ghebenedidene god

9

ende seide. Die here god van israhel moeti ghebenedien: want du biste een alte guets mans sone ende gherechtichs. die gode ontsiet ende aelmissen doet.

10

Ende men moet benedictie segghen op dijn wijf. ende op uwe vader ende op uwe moeder:

11

want ghi moet uwe kinder sien ende uwe kinder kindere tot int derde ende int vierde gheslachte: ende uwe sade moete sijn ghebenedijt van gode van israhel. die ewelijc ende emmermeer regneert.

12

Ende doe si alle hadden gheantwoert amen: soe ghinghen si ter werscappen vander brulocht: mit sheren vrese