Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[vervolg 8:1]TObias ghedachte dan des enghels woerden ende hi toech wt sijnre malen een stucke vander leueren: ende hi leyt op leuende colen. | |
1[8:2]Ende raphael den enghel begreep doe den duuel: ende hi banten inder wildernissen vanden hoecheden van egipten. | |
2[8:3]Tobias troeste doe der maghet: ende seide tot haer Stant op sara ende bidden wi den here huden ende morghen ende ouermorghen: want in desen drien nachten worden wij mit gode gheuoghet: mer als die derde nacht leden is. so sullen wi in onsen huwelike wesen. | |
3[8:3]Want wij sijn heiligher lude kindere: ende wi en moghen also niet vergaderen also die heidene die gode niet en kennen. | |
4[8:5]Ende si stonden te gader op ende si beden beide te gader naersteliken: dat hem ghesontheit moeste worden ghegeuen | |
5[8:6]Ende tobias seide. Here onse vader dij moeten louen die hemele ende die aerde ende die zee ende die fonteinen ende die riuieren: ende alle dijn creaturen die daer binnen sijn. | |
6[8:7]Du makeste adam vanden lime der aerden ende du gaueste hem te hulpen euam. | |
7[8:8]Ende here nv weetste dat ic mijnre suster niet en neme te wiue om die sake van onkuysheden: mer allene om die minne van nacomelinghen daer dijn name in worde ghebenedijt ewelijc ende emmermere. | |
8[8:9]Ende sara seide aldus. Ontferme ons here ontferme ons: ende wij moeten huden te gader out worden ghesont. | |
9[8:10]Ende het gesciede omtrent der hanen sanc soe gheboet raguel sijnen knapen te halene: ende si ghinghen te gader mit hem om een graft te grauen. | |
10[8:11]Want hi seide: oft hem oec also gheuallen is. als die seuen mannen die tot haer inghinghen. | |
11[8:12]Ende doe si tgraft ghereet hadden: so keerde raguel weder tot sijnen wijue. ende hi seide haer. | |
12[8:13]Sende ene van dinen ioncwiuen. dat si besie ofte hi doot is: dat icken mach grauen eert claert. | |
13[8:14]Ende si sant enen van haren ioncwijuen. Ende doe si in die camer comen was so vant sijse beyde tegader slapende ende ghesont ende weluarende | |
14[8:15]Ende si keerde weder ende boetscapte ene goede nyewemare Ende raguel ende sijn wijf loefden gode | |
15[8:16]ende seiden. Here god van israhel wi gebenedien di want ons en is niet gheschiet alsoe wij hadden ghewaent. | |
16[8:17]Want du heueste mit ons dine ontfermicheit ghedaen: ende du hebste van ons verdreuen onsen viant die ons persequeerde. | |
17[8:18]Want du hebste ontfermenisse op twe enighe kinderen. Mijn here dochse di volmaecteliker benedien: ende dochse di offeren sacrificie dijns loefs ende hare ghesontheit: dat alle die heidene bekennen moeten. dattu allene god biste in allen landen | |
18[8:19]Ende raguel beual te hant sinen knapen dat sijt tgraft vollen souden dat si ghemaect hadden: eert claerde. | |
19[8:20]Ende | |
[pagina *133]
| |
hi seide sijnen wijue dat si ene werscepe ghereden soude: ende dat si alle ghereiden soude datter spise notorftich waer den ghenen die wandelen souden | |
20[8:21]Ende hi dede slaen twe vette coeyen. ende vier rammen: ende hi dede maeltiden ghereiden alle sine ghebueren. ende vrienden | |
21[8:22]Ende raguel swoer tobiam: dat hi twe weken mit hem bliuen soude. | |
22[8:23]Ende van al dien dat raguel had soe gaf hij die helfte tobiam: ende hij maecte dit ghescrifte: dat dander helft die hem bleef. te tobias heerscap comen soude na hare doot. |
|