Bible in duytsche (Delftse bijbel 1477)

§ Capittel .vij.

1

ALdus ghinghen sij in raguels huse: ende raguel ontfincse mit bliscepen.

2

Ende raguel mercte tobiam: ende seide tot annen sijnen wijue. Hoe ghelijc is desen ionghelinc mijnen maech

3

Ende doe hi dat gheseit hadde. so seide hij. Ghi ionghelinc mijnen broeder waen si di? Si seiden. Wt neptalims gheslachte sijn wij: vander gheuancnisse van niniue.

4

ende raguel seide hem Kendi tobiam mijnen broeder: ende si seiden Ia wi.

5

Ende doe hi vele guets van hem sprac: so seide dinghel tot raguel. Tobias daer du om vraghes. is deses vader.

6

Ende raguel viel op hem. ende mit tranen custe hine: ende hi weenden op sijnen hals

7

ende seide Sone mijn dit moet benedictie sijn: want du biste eens alte goeden mans soon.

8

Ende anna sijn wijf ende sara hoer dochter weende

9

Ende na dien dat si ghesproken hadden. soe beual raguel enen ramme te slaen. ende ene werscap te ghereiden . Ende doe hijse bat dat si ten eten souden gaen sitten:

10

soe seide tobias. Ic en sal hier huden eten noch drincken: en is dattu mi te voren mijnen heyssche versekerste: ende beloefte mij te gheuen saram dijnre dochter.

11

Doe raguel dit woert hoerde soe ontsach hi hem. om dat hij wiste wat die seuen mannen gheschiet was die tot haer inghegaen waren: ende begonste tontsien: dattet machschien desen ionghelinc also oec gheuallen mochte. Ende doe hi in twiuelinghe was wat hi doen mochte ende hi den ionghelinc en ghene antwoerde en gaf:

12

soe seide hem denghel. En wilt niet ontsien desen man haer te gheuen: want desen die gode ontsien so ismen dijnre dochter te wiue sculdich. Ende hier om en mochtse en ghenen anderen man hebben

13

Raguel seide doe. Ic en twiuel niet god en heeft in sijnen aenscouwen ontfaen mine bedinghe ende mijn tranen.

14

Ende ic gheloue dat hi daer om v te mi heeft doen comen: dat dese huwen soude in haer maechscap. na moyses wet. Ende nv en wilt niet twiuelen: ic en salse di leueren.

15

ende hi ghegrepe sijnre dochter rechter hant: ende hi gafse in tobias rechter hant ende seide. Abrahams god ysaacs god ende iacobs god moet mit v wesen.ende hi moet v vergaderen. ende hi moet sine benedictie voldoen in v luden.

16

Ende sij namen enen tsartere. ende maecten ghescrifte van den huwelike.

17

Ende hier na ghinghen si werscepen: ende loefden gode.

18

Ende raguel riep annam sijn wijf te hem: ende

[p. *132]

beual dat si een ander camere ghereiden soude.

19

Ende hij leider saram sijnre dochter in: ende sij wenede.

20

Ende hi seide haer. Dochter mijn wes starc van gedachten. God des hemels moet dij bliscap gheuen ouer tverdriet dattu ghedoghet hebste.

21[8:1]

Ende na dien dat sij tauontmael ghedaen hadden: so leiden si den ionghelinc in te hare