Bible in duytsche (Delftse bijbel 1477)

Ca .iiij

[p. *128]

1

ALs tobias dus hoepte dat sine bedinghe ghehoert was. dat hij soude moghen steruen: so riep hi tobiam sijnen sone te hem:

2

ende seide hem. Sone mijn hore die woerden mijns monts ende legse in dijn herte als een fundament.

3

Als god mine ziele ontfaen heeft so begraue mijn lichaem: ende du sulste dijnre moeder in eren hebben: alle die daghen dijns leuens.

4

Want du biste sculdich te ghedencken: hoe vele ende hoe grote vrese dat si om dijnen wille ghehad heeft ende ghedoecht in haren lichame.

5

Ende als si oec voldaen sal hebben die tijt haers leuens: soe sulstuse oec neuen mij begrauen.

6

Du sulste alle die daghen dijus leuens gode int harte hebben: ende wachte dij dattu ghenen tijt willich der sonden en wercste: ende en laet achter niet ons gods ghebode.

7

Doch aelmisse van dijnen goede: ende en wil dijn aensichte niet keren van ghenen armen. Want also sal gheschien dat sheren aensichte oec van di niet en sal worden gekeert.

8

Alsoestu sulste moghen: so wes ontfermhertich.

9

Heefstu vele so gif oueruloeyliken: ende heefstu oec luttel: soe wes oec aernstich een luttel te gheuen.

10

Want du gaderste te dijnen behoef enen goeden loon. inden daghe der nootsaken:

11

want die aelmisse verlost van allen sonden ende vander doot: ende si en sal niet gedoghen dat die ziele sal gaen in donckerheden.

12

Die aelmisse sal groot betrouwen wesen voer den hoghen god: hem allen diese doen.

13

Wachti sone van alre onkuysheit: Ende en laet nemmermeer grote misdaet weten sonder dinen wiue.

14

En laet nemmermeer houaerde te bouen comen in dijnen sinne of in dijn woert. Want alle verdervende namt beghin in die houaerde

15

Soe wie datti yet werken sal. gheue hem te hant sijn loen: ende den loon dijns huer knapen en bliue al met allen bi di niet.

16

Dattu niet en wilste datti een ander doe: besich dattuut in ghenen tijt enen anderen doetste.

17

Eet dijn broot mitten ghenen die honghert ende mitten armen: ende decke die naecte mit dijnen clederen.

18

Sette dijn broot ende dinen wijn op eens gherechtichs begrauen: en wilre niet of eten noch drinken mitten sondaren.

19

Onderuraghe altoes raet vanden wijsen.

20

Talre tijt benedijt gode: ende bidde van hem dat hy dijne weghen beleiden moet: ende al dine vonnissen sullen altoes in hem bliuen.

21

Sone mijn ic doe di oec te weten dat ic in rages die stat van meden gaf gabelo tien talenten siluers doestu noch een ionghelinc ende een kindekijn waerste: ende ic heb sine cyrographe bij mij.

22

Ende hier om so besich hoe du tot hem comen moechste: dattu van hem moechste ontfaen tvoerseide ghewichte van siluer: ende dattu hem sijnen cyrographe weder gheefste.

23

Sone mij en wille niet ontsien: want wij leiden een arm leuen: mer wi sullen vele goets hebben op dat wi gode ontsien. ende gae wij wech van onse sonden ende vliene all quaet: ende so doen wij wel