Bible in duytsche (Delftse bijbel 1477)

§ Capittel .ij.

1

HIer na doet een van sheren feesteliken daghen was ende enen goeden maeltijt ghereit was in tobyas huys:

2

so seide hi tot sijnen soon. Ganc ende brenc enighe van onsen gheslachte die gode ontsien: dat si mit ons werscapen moghen.

3

Ende doe hi wech ghegaen was: so keerde hi weder ende seide dat ene vanden kinderen van israhel doot laghe in die strate. Ende hi spranc te hant op ende liet sijn maeltijt van daer hi gheseten was.

4

ende hi quam al vastende totten lichame: ende hi nam hem. ende droech hem al heimelike tot sinen huys: dat hine al heimeliken granen soude als die sonne onderghegaen soude sijn.

5

Ende doe hi den lichame ghe-

[p. *126]

borghen hadde. so at hi broot mit ghewene ende mit anxte:

6

ende ghedachte dier woerden dat die here gheseit hadde bi amos den prophete. Iuwe feestelike dage sullen worden verkeert in gewene ende in ghescreyen.

7

Ende doe die sonne onder ghegaen was soe ginc hi wech ende groeffen.

8

Ende alle sijn naesten berispeden. ende seiden. Onlanghe ist datmen di beuolen had te doden om dustane dinc: ende nauwe bistu ontuloen tgebot des doots ende graefstu weder die dode?

9

Mer tobias ontsach gode meer dan den coninc ende nam der doder lichame ende brachtse in sijn huys: ende te middernacht groef hijse.

10

Ende het ghesciede dat hi op enen dach moede was van bergrauen ende dat hi thuys quam ende warp hem seluen neder ieghen ene want ende hi wort slapende:

11

daer hi lach ende sliep so viel wt enen swaluwen neste werm stront op sijn oghen: ende hi wordt blint.

12

Mer die here die liet hem dese becoringhe gheschien: om dat den nacomelinghen souden worden ghegheuen exempel van sijnre ghedoechsaemheit: ghelijc den heilighen iob.

13

Want om dat hi van sijnre kintsheit den here altoes ontsien hadde: ende sijn gheboden bewaert hadde so en wort hi ieghen den here niet bezericht om dat hem die plaghe van blintheden aencomen was:

14

mer hi bleef onberuert in gods vrese: ende danckede gode alle die daghen sijns leuens.

15

Want gheliken dat den heilighen iob die coninghen verweten: also daden si oec desen vader ende sijn maghe bespotten sijn leuen ende seiden.

16

Waer is dijn hope daer du om dades aelmisse ende begrauinghe der doden?

17

Ende tobias berisptese ende seide. En wilt also niet spreken:

18

want wi sijn heyligher lude kinder. ende wij ontbeiden dat leuen: dat god den ghenen gheuen sal die haer gheloue nemmermeer van hem en verkeren.

19

Ende anna sijn wijf ghinc daghelijcs ten werke van weuen. ende si bracht lijftochte die sij ghecrighen mochte mitter pine van haren handen.

20

Waer bi dat gheuiele: dat sij ontfinc enen hueken vanden gheiten. ende si brachtet thuys.

21

Ende doe haer man ghehoert hadde sijn stemme bletende. so seide hi. Besiet dattet machschien niet ghestolen en sij Gheuet weder sijnen here: want ons en is niet gheoorloft van dieften yet te eten of te ghenaken.

22

Hier mede wort sijn vijf vergramt ende si antwoerde. Openbaerlic is dijn hope ydel gheworden ende nu sijn dijn aelmissen gheopenbaert.

23

Ende mit desen ende dustanen woerden verweet si hem.