Bible in duytsche (Delftse bijbel 1477)

§ Capittel .I.

1

TObias was vten gheslachte ende eenre stat van neptalim. die is inden hoochsten van galilea bouen naason. achter den wech die leit ten westen waert. Ende hi hadde in die luchterzide die stat sephet:

2

doe hi gheuanghen was in salmanasar des conincs van assirien daghen. al was hi inder gheuanghenisse nochtan en liet hi die wech der waerheit niet:

3

also al dat hi hebben mochte deelde hij daghelijcs metten gheuanghenen broeders die wt sijnen gheslachte waren.

4

Ende al was hi die ioncste van al neptalims gheslachte. nochtan en dede hij niet kuntschelijc in werken

5

Ende doe sij al ghinghen ten guldene calueren die ieroboam die coninc van israhel ghemaect had so vloech dese allene al haer gheselscap:

6

ende hi toech in iherusalem tot des heren temple. ende daer bat hi den here god van israhel: ende hi offerde ghetrouwelijc alle sine primicien ende sijn tienden.

7

also dat hij in den derden iare den vreemden besne-

[p. *125]

dene ende den toecomelinghen deylde al sijn vertienden.

8

Dit ende dies ghelijc na gods wet so behielt dit kindekijn.

9

Mer doe hi een man worden was soe nam hij een wijf annen wt sijnen gheslachte: ende hi wan enen soon an haer ende gaf hem sijn selfs name:

10

ende die leerde hi van sijnre kintsheit gode te ontsien ende hem te wachten van allen sonden.

11

Ende doe hi bider gheuanghenisse ghecomen was mit sijnen wijne mit sijnen sone in die stat van niniue mit al sijnen geslachte.

12

ende sij alle aten vander heidenre spise: so wachte dese sine ziele: ende hi en wort niet besmet in haren spisen.

13

Ende om dat hi tsheren gedochte in al sijnre harten. so gaf hem god gracie in des conincs salmanasars aenscouwen:

14

ende hi gaf hem macht dat hi gaen mochte daer hi wilde: ende dat hi vryheit had te doen so wat hi soude willen.

15

Ende hi toech tot hem allen die in gheuancnissen waren: ende hi gaf hem vermaninge van salichheden.

16

Ende doe hi gecomen was in rages een stat van meden. ende hi had thien talenten siluers: van dien daer hi mede geeert was vanden coninc:

17

ende hi gabele breke sach hebben mit eenre groter scaren van sijnen gheslachte die wt sine gheslachte was: so gaf hi hem onder ene cyrographe dat voerseide ghewichte van siluere.

18

Ende na veel tijts doe salmanasar die coninc doot was. ende sanacherib sijn soon ouer hem regneerde. ende hi die kinder van israhel in sijnen aensconwen in hatyen had:

19

so voer tobias daghelijcs al sijn maechscip doer. ende troestese: ende hi deelde elken so hi vermochte van sijnen goede.

20

Ende hi voede die hongher hadden: hi gaf cleder die naect waren: ende aernstelijc begrof hi die dode ende die doot gheslaghen waren.

21

Ende oec doe sennacherib die coninc wedercomen was van iuda vliende om die plaghe. die god omtrent hem ghedaen had om sijnre blasphemien wille. ende hi om gramscepe vele der kinder van israhel dootsloech: so groef tobias haer lichamen.

22

Mer doet den coninc gheseit was. so beual hien doot te slaen: ende hi nam hem al sijn goet.

23

Mer tobias vloe mit sijnen wiue ende met sijnen sone ende wort al bloet verborghen: want vele luden minneden.

24

Mer na vijf ende veertich daghen so sloghen den coninc doot sijn sonen.

25

Ende tobias keerde weder tot sijn huys: ende men gaf hem al sijn goet weder.