Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermdTobias | |
§ Ende hier beghint dat prologus van tobias | |
DIe hestorie van tobien begonste doe die thien gheslachten van israhel. worden gheuanghen wech gheuoert van salmanasar den coninc van assirien. Mer welke tijt dat sij einde dat is doncker. Want na den texte van den boke so schijnt dat tobias leuede tot dat iherusalem ghedestrueert wort Want hi seit in sijn liedekijn iherusalem gods stat die here heeft dij ghecastijt loue god ewelike dat hij in di verstichten moet sijn tabernacule.Ende dat hi alle di gheuanghene weder totti vergaderen moet. Ende doe hi steruen soude eude sijnen sone voerseide dattie gheuanghene weder keren souden so seide hi aldus. Tlant dat ydel is sal veruolt worden. Ende sheren huys datter in verbarnt is salmen weder stichten |
|