Bible in duytsche (Delftse bijbel 1477)

§ Capit .xiij.

1

IN dien daghe is ghelesen in den boecke moysi: den volc horende Ende het is gheuonden daer in ghescreuen. dat die ammoniten ende moabiten niet en souden ingaen in die kerck gods hent inder ewicheit:

2

daer om dat si den sonen israhel niet teghen en quamen mit brode ende water: ende teghen hem ghehuert hadden balaam om hem te vermaledien: ende god heeft die maledictie verwandelt in benedictie.

3

Ende het is ghesciet doe sij ghehoert hodden die wet: hebben si ghesceiden alle vreemde van israhel.

4

Ende ouer dat was eliasib priester die een proost was inder scatcamer des huys ons gods: ende maech tobie.

5

Hier om heeft hi hem ghemaect een groot scathuys: ende daer waren voer hem die leiden ghauen ende wieroec. ende vaten. ende tiende des tarwes. wijns ende olijs: deelen der leuiten ende der sangheren ende doerwaerderen ende eerste vruchten der priesteren.

6

Mer in al desen en was ic niet in iherusalem: want int twe ende dertichste iaer artarxersis des conincs van babilonien bin ic ghecomen totten coninc. Ende int eynde der daghen heb ic ghebeden den coninc

7

ende bin ghecomen in iherusalem. Ende ic heb verstaen tquaet dat heliasib had ghedaen thobie: om dat hi hem ghemaect had enen scat in den portalen des huys gods:

8

ende het docht mij seer quaet. Ende ic werp die vaten des huys thobie wt van den scathuys:

9

ende ic heb gheboden. ende sij hebben ghereinicht die scatcamer. Ende ic heb daer in weder ghedraghen die vaten des huys gods. offerhande ende wieroec.

10

Ende ic heb bekent dat die deelen der leuiten niet en waren ghegheuen: ende dat een yeghelic van den leuiten ende sangheren

[p. *123]

ende vanden ghenen die dienden was gheuloen in sijn lant:

11

ende ic heb geclaecht teghen die meesterscappen. ende heb gheseit. Waer om hebben wi achter ghelaten thuys gods? Ende ic hebse vergadert: ende hebse doen staen in horen stacien.

12

Ende al iuda heeft toe ghedraghen tiende des tarwes. wijns. ende olijs. in die scuren.

13

Ende wij hebben gheset ouer die scuren selemiam priester. ende sadoch meester der wet. ende sadaiam vanden leuiten: ende bi hem anan een soon zachur een zoon mathanie want sij trouwe gheproeft sijn: ende hem sijn beuoelen die delen hoere broederen.

14

Mijn god ghedenct mijns om dat: ende wilt niet ofdoen mijn barmherticheden die ic ghedaen hebbe in den huse mijns gods ende in sijnen cerimonien.

15

In dien daghen heb ic ghesien in iuda sommighe tredende die wijn parsen in den sabboth: draghende hopen ende ladende op die eselen wijn ende druuen. ende vijghen ende alle last: ende in draghende in iherusalem in den dach des sabboths. Ende ic heb hem ghetuicht dat sij vercopen souden inden dach in welc gheoorloft was te vercopen.

16

Ende die van tiren hebben ghewoent in haer: indraghende visschen. ende alle dinc te coop. Ende vercochten in den sabbaten den sonen iuda ende iherusalem.

17

Ende ic heb berispt die opperste iuda: ende heb hem gheseit. Welc is dat quade dinc dat ghi doet: ende omtrent den dach des sabboths?

18

En hebben dat oec niet ghedaen onse vaderen: ende onse god heeft op ons ghebrocht al dit quaet. ende op dese stede? Ende ghi toedoet toirn op israhel: brekende den sabboth.

19

Mer het is ghesciet doe die poorten van iherusalem rusten in den dach des sabbots: heb ic gheseit. ende si hebben ghesloten die doeren: ende ic heb gheboden dat sij die niet opdoen en souden hent na den sabboth. Ende ic heb gheset van mijnen knechten op die poorten: om dat nyemant en soude indraghen last in den dach des sabboths

20

Ende die coopluden ende die vercopers die alle dinghen te coop brochten sijn ghebleuen buten iherusalem eens ende twewerf:

21

ende ic heb hem ghetuucht: ende heb hem gheseit. Waer om blijfdi teghen die muer? Ist sake dat ghi dat anderwerf doet: ic sal mijn hant aen v slaen. Hier om van diere tijt en sijn sij niet ghecomen in den sabboth.

22

Ende ic heb gheseit den leuiten dat sij ghereinicht souden worden ende comen tot die poorten te bewaren: ende den dach des sabboth te heilighen. Ende hier om god ghedenct mijns om dat. ende spaert mi na menichuoudicheit dijnre barmherticheden.

23

Mer oec in dien daghen heb ic ghesien ioden trouwende wijuen van asoten. vanden amoniten. ende moabiten.

24

Ende hoer sonen spraken half azoetse tale: ende consten niet spreken ioedsche tale ende spraken na die tonghe des volcs ende des volcs.

25

Ende ic heb die berispt: ende vermaledijt. Ende heb gheslaghen van hem mannen ende hebse cael ghemaect: ende ic hebse besworen in god dat si niet en souden gheuen hoer dochteren den sonen diere luden: ende niet nemen en souden van den dothteren

[p. *124]

diere luden horen sonen. ende hem seluen segghende

26

En heeft salomon die coninc israhel niet ghesondicht in deser manieren? Ende voerwaer onder veel volken. en was gheen coninc hem ghelijc: ende hi was lief sijnen god: ende god beeft hem gheset coninc op al israhel ende hem hebben vreemde wijuen gheleit tot sonde.

27

Sullen wi niet onderdanich oec doen al dit grote quaet. dat wij ouertreden in onsen god: ende trouwen vreemde wijuen?

28

Mer vanden sonen ioiada een soons eliasib. des groten priesters. was swagher sanavallach oronitis welc ic van mij geiaecht heb.

29

Ghedenc heer mij god teghen die gheen die bemetten die priesterscap: ende dat priesterlike recht ende der leuiten.

30

Hier om heb icse ghereinicht van allen vreemden: ende heb gheset ordinancien der priesteren ende leuiten. een yeghelic in sijnen dienst:

31

ende in offeringhe der houten in ghesetten tijden ende in den eersten vruchten. Ghedenct mijns mijn god int goede.

Hier enden die boeken van esdras ende neemias