Bible in duytsche (Delftse bijbel 1477)

§ Capittel .ix.

1

MEr in den vier ende twintichsten dach deser maent sijn tsamen ghecomen die sonen israhel in vasten. ende in sacken: ende aerde op hem.

2

Ende dat gheslacht der sonen israhel is of ghesceiden van allen vreemden sonen: ende hebben ghestaen ende hebben belijt hoer sonden ende die boosheden hore vaderen.

3

Ende sijn tsamen opgheresen om te staen: ende hebben ghelesen in den boec der wet des heren hoers gods vierwarf in den daghe: ende vierwarf hebben si belijt. ende aenghebeedt den heer horen god.

4

Mer op die graden der leuiten sijn op ghestaen iosue ende bani. ende cemihel. remni sabnia. abani. sarebias. bani. thanani: ende hebben gheropen mit groter stemmen totten heer horen god.

5

Ende die leuiten iosue ende chedmihel. bonni. asebia serebia. arebia. odaia. sebna. fataia hebben gheseit. Staet op gebenedijt den heer onsen god. van ewicheit tot inder ewicheit. Ende sij moeten benedien den hoghen naem dijnre glorien in alre benediinghe ende loue.

6

Du selue heer alleen: du hebste gemaect den hemel ende hemel der hemelen ende al hoer scare. die aerde ende alle die daer in sijn: die zeen ende alle dinghen die daer in sijn. Ende du maecste leuendich alle dese: ende theer des hemels aenbeedt dij.

7

Du selue heer god die wtuercoren hebste abram ende hem wtgheleit van den vier der chaldeen: ende heb sijnen naem gheset abraham.

8

ende hebste geuonden sijn hert ghetrou voer dij: ende hebste mit hem gheslagen een vorwaerd dattu hem gheuen soudste die aerde chananei. ethei. euei. ende amorrei. ende pheresei. ende ihebusei. ende gergesei. dattu gheuen soudste sijnen sade. Ende du hebste veruolt dijn woerden want du rechtuaerdich biste.

9

Ende du hebste ghesien die castiinghe onser vaderen in egipten. ende du hebste ghehoert hoer ropen opt rode meer:

10

ende du hebste ghegheuen tekenen ende wonderlike dinghen in pharaone. ende in al sijnen knechten: ende in al den volke sijns lands. Want du hebste bekent dat si houaerdelic ghedaen hadden teghen hem: ende du hebste dij ghemaect enen naem. als oec in desen daghe.

11

Ende du hebste ghesceiden dat meer voer hem: ende sij sijn ouerghegaen doert middel des meers in den droeghen. Ende hoer veruolghers hebdi gheworpen int diep als een steen in stercken wateren:

12

ende in een columne der volken hebstu gheweest hoer leidsman in den daghe. ende in een columne des viers

[p. *116]

in der nachte: op dat hem openbaren soude een wech doer welc si inghingen

13

Ende du biste neder gheclommen totten berch synai: ende hebste ghesproken mit hem vanden hemel: ende hebste hem ghegheuen rechte oerdelen ende een wet der waerheit. ende cerimonien. ende goede gheboden.

14

Ende du hebste hem ghetoent dijnen heilighen sabboth: ende gheboden ende cerimonien. ende du hebste hem gheboden een wet in die hant moysi dijns knechtes.

15

Ende ghi hebt hem ghegheuen broot vanden hemel in horen hongher: ende du hebste wt gheleit hem water vanden steen doe sij dorst hadden. Ende du hebste hem gheseit dat si in souden gaen ende besitten tlant: op welke du op gheheft hebste dijn hant om hem te gheuen.

16

Mer sij ende onse vaderen hebben houaerdelic ghedaen. ende hebben verhardt hoer nacken: ende hebben niet ghehoert dijn gheboden. ende wouden niet horen:

17

ende sij en hebben niet ghedocht der wonderliker dinghen die du hem ghedaen hebste. Ende sij hebben verhardt hoer nacken: ende hebben ghegheuen thooft dat sij ghekeert souden worden tot horen eyghendom. als ouermits een kijuinghe. Mer du god ghenadich goedertieren ende barmhertich langmoedich ende veelre ontfermenisse en hebtsete niet achter gelaten.

18

Ende doe si ghemaect hadden een ghegoten calf ende hadden gheseit dit is dijn god die dij wtgheleit heeft van egipten. ende hebben ghedaen grote blasphemie:

19

mer du in dijnen groten barmherticheiden en hebtse niet ghelaten inder woestenien. Die columne des volcs is niet wech ghegaen van hem doer den dach. om dat sij hem leiden soude in den wech: ende die columne des viers doer den nacht: om dat si hem toonen soude den wech doer welcken si ingaen souden

20

Ende du hebste ghegeuen dijnen goeden gheest die hem leren soude: ende du en hebste niet verboden dijn hemels broot van horen monde: ende du hebste hem water ghegheuen in den dorste.

21

Veertich iaren hebstuse gheuoedet inder woestijnen: ende niet heeft hem ontbroken. Hoer clederen sijn niet veroudet: ende hoer voeten sijn niet versleten.

22

Ende du hebste hem ghegheuen rijcken ende vlocken: ende du hebste hem ghedeylt loten. Ende sij hebben beseten tlant seon. ende tlant des conincs esebon: ende tlant og des conincs basan.

23

Ende du hebste vermenichuoudicht hoer sonen als sterren des hemels: ende hebtse toeg eleit totten lande van welken du gheseit hadste horen vaderen dat sij ingaen souden ende besitten.

24

Ende die sonen sijn ghecomen: ende hebben tlant beseten. Ende du hebste veroetmodicht voer hem die woonres des lants die chananeen: ende hebt die ghegheuen in hoer hant: ende hoer coninghen. ende volcken des lants: dat sij hem doen souden alst hem behaechde.

25

Ende si hebben ghenomen stercke steden. ende vette aerde: ende hebben beseten husen vol van allen goeden. ende putten van anderen luden ghetimmert: wijngarden ende steden der olibomen. ende veel appelbomen. Ende sij hebben gegheten ende sijn sat gheworden: ende sijn

[p. *117]

vet gheworden. ende hebben oueruloit in ghenoechten in dijnre groter goetheit.

26

Mer sij hebben dij verwect tot toornicheit. ende sijn wech ghegaen van dij: ende si hebben dijn wet gheworpen achter hoer rugghe. Ende hebben dijn propheten ghedoot die hem tuichden dat si weder keren souden tot dij: ende si hebben ghedaen grote blasphemie.

27

Ende du hebtse ghegeuen in die hant hore vianden: ende si hebbense ghepijnt. Ende in der tijt hore tribulacien hebben sij gheropen tot dij: ende du van den hemel hebste ghehoert. ende na dijn grote barmharticheden hebstu hem ghegheuen enen ghesontmaker: diese ghesont soude maken vander hant hore vianden.

28

Ende doe si hadden gherust sijn sij weder ghekeert om quaet te doen in dijn aenscijn: ende du hebtse achter ghelaten in die hant hore vianden: ende die hebbense beseten. Ende sij sijn bekeert ende hebben gheropen tot di. Ende du vanden hemel hebtse verhoert ende verlost in dijnen bermharticheden veel tijden:

29

ende du hebtse vermaent om weder te keren tot dijn wet. Mer si hebben houaerdeliken ghedaen: ende hebben niet ghehoert dijn gheboden. ende in dijnen oerdelen hebben si ghesondicht: welc een mensche sal doen. ende sal leuen in hem. Ende sij hebben ghegheuen een wechgaende scouder: ende hebben verhardt horen nac: ende hebben niet ghehoert.

30

Ende du hebste verlanct op hem veel iaren: ende du hebste die vermaent in dijnen gheest doer die hant dijnre propheten ende si hebben niet ghehoert: ende du hebste die ghegheuen. in die hant der volken der aerden.

31

Mer in dijnen groten barmherticheden hebstuse niet ghegheuen in verderfenisse: noch en hebtse niet ghelaten: want god der barmherticheden ende goedertieren bistu.

32

Hier om nv onse god groot. sterc ende veruaerlic. bewarende vorwaerd ende barmherticheit: en wilt niet ofkeren van dijn aensicht al den arbeit die ons gheuonden heeft. onse coninghen. onse princen. ende onse priesteren ende onse propheten. ende onse vaderen. ende al dijn volc: vanden daghen des conincs assur. hent tot desen dach.

33

Ende du biste rechtuaerdich in al den dinghen die ghecomen sijn op ons. want du hebste ghedaen die waerheit: mer wi hebben booslic ghedaen.

34

Onse coninghen. onse princen. onse priesteren. ende onse vaderen. en hebben niet gedaen dijn wet: ende hebben niet aenghemerct dijn gheboden. ende dijn ghetughen die du ghetuicht hebste onder hem.

35

Ende sij in horen goeden rijken. ende in dijnre groter goetheit die du hem ghegeuen hadste. ende in dat wijde ende vette lant dattu ghegheuen hadste in horen aenscijn. en hebben sij dij niet ghedient: ende sijn niet weder ghekeert van horen quaden werken.

36

Siet wij selue sijn huden knechten: ende die aerde die du ghegeuen hebste onsen vaderen om te eten tbroot daer van. ende die goeden die daer in waren: ende wij selue sijn knechten daer in.

37

Ende die vruchten des lands worden vermenichuoudicht den coninghen die du gheset hebste op ons

[p. *118]

om onse sonden. ende hebben heerscappie ouer onse lichamen ende ouer onse beesten na horen wil: ende wij sijn in groten verdriet.

38

Hier om van al desen hebben wij selue gheslaghen een vorwaerd ende scriuen: ende onse princen teikenen: onse leuiten ende onse priesteren.