Bible in duytsche (Delftse bijbel 1477)

§ Ca .viij

1

ENde die seuende maent was ghecomen. Mer die kinderen israhel waren in horen steden. Ende al tvolc vergadert als een man bij die straet die is voer die poorte der wateren: ende hebben gheseit esdre den meester dat hi halen soude tboeck des wets moysi: welc die heer gheboden had israheli.

2

Hier om heeft esdras priester gehaelt die wet voer die scare der mannen ende wijuen. ende voer alle den ghenen die verstaen mochten: in den eersten dach der seuender maent.

3

Ende heeft daer in

[p. *114]

ghelesen openbaerlic in die straet die was voer die pooete der wateren. van den morghen totten middach: int aenscijn der mannen ende wijuen ende der wijsen. Ende die oren al des volcs waren opgherect totten boeck

4

Mer esdras doctoer heeft ghestaen op een houten trap die hi ghemaect had om te spreken. ende bi hem hebben ghestaen. matathia. ende senia. ende ania. ende vria. ende elchia. ende maasia tot sijn rechter hant. ende totter luchter hant phadaia. misahel. ende melchia. ende asum. ende aseph. dana zacharia ende mosollam.

5

Ende esdras heeft opghedaen tboeck voer al tvolc. Want hij sceen wt bouen al tvolc. Ende doe hi thoeck had op ghedaen stont al tvolc

6

Ende esdras heeft ghebenedijt den heer god. mit groter stemmen. Ende al tvolc heeft gheantwordt. amen. amen opheffende hoer handen Ende si sijn ghecromt ende hebben aenghebeedt god voerwart mitten hoofde in die aerde.

7

Mer iosue ende baani. ende serabia. yamin accub. septhai. odia. maasia. celita. azarias. iozabed. anani. phalaia leuiten hebben ghemaect swighinghe in den volc: om die wet te hoeren. Mer tvolc stont in sijnen grade.

8

Ende si hebben ghelesen in den boeck des wets gods besceidelic. ende bi gheset om te verstaen: ende doet ghelesen wort hebbent sij verstaen.

9

Mer neemias heeft gheseit. hij is athersatha. ende esdras priester ende meester. ende die leuiten hebbent beduyt al den volc. Dese dach is gheheilicht den heer onsen god Wilt niet weenen ende wilt niet screien. Want al tvolc screide: doe sij hoerden die woerden der wet

10

Ende heeft hem gheseit. Gaet etet vette dinghen ende drinct claereit of most: ende sendt delen den ghenen die niet voer hem seleuen bereit hebben want het is een heilch dach des heren: en wilt niet drouich sijn. want blijscap des heren is onse starcheit.

11

Mer die leuiten maecten swighinghe in al den volc segghende. Swijcht: want dese dach heilich is: en wilt niet droeuich sijn.

12

Daer om is al tvolc wech ghegaen om te eten. ende te drincken. ende te senden delen: ende om te maken grote blijscap: want sij verstaen hadden die woerden die hi hem gheleert had.

13

Ende in den anderen dach sijn vergadert die princen der familien al des volcs priesteren ende leuiten tot esdram den meester: dat hi hem beduyden soude die woerden des wets.

14

Ende sij hebben gheuonden ghescreuen in der wet. dat die heer gheboden had in die hant moysi. dat die kinderen israhel souden wonen in tabernaculen in die hoochtich der seuender maent:

15

ende dat sij prediken souden ende openbaren die stemme in al horen steden. ende in iherusalem segghende. Gaet wt in den berch: ende haelt twighen des oliboems. ende twighen des alre scoonsten boems twighen van gaghel boem. ende twighen der palmboem. ende twighel des boems die veel tacken heeft. op dat ghemaect moghen worden tabernaculen als ghescreuen is.

16

Ende tvolc is wtghegaen ende hebben ghehaelt. Ende hebben hem ghemaect tabernaculen een yeghelic in sijnen dake ende in sijnen salen: ende in den

[p. *115]

salen des huys gods. ende inder strate der waterpoerte: ende in die strate ephraim.

17

Hier om al die vergaderinghe der gheenre die weder ghecomen waren vander vangenisse heeft gemaect tabernaculen: ende hebben daer in ghewoont Want die kinderen israhel hadden soe niet ghedaen vanden daghen isoue eens soons nun: hent tot dien dach Ende seer grote heeft gheweest die vrolicheit.

18

Mer hi heeft ghelesen in den boec der wet gods doer alle daghen. van den eersten dach totten lesten. ende hebben ghemaect hoochtijt seuen daghen: ende in den achten dach een collect na der ghewoenten.