Bible in duytsche (Delftse bijbel 1477)

§ Capittel .vi.

1

MEr het is doe ghesciet sanaballath had ghehoert ende thobias. ende gosen van arabien. ende die ander onse vianden. dat ic ghetimmert hadde die muer. ende dat gheen onder scoringhe daer in en was ghebleuen: mer tot diere tijt had ic gheen doeren gheset inden poerten:

2

hebben ghesent sanaballath. ende gosen van arabien tot mi segghende. Comt ende laet ons tsamen slaen een vorwaerd inden dorpen in een velt Mer sij dochten dat si mi quaet souden doen.

3

Daer om heb ic boden ghesent tot hem segghende. Ic maec een groot werc. ende ic en mach niet neder climmen: op dat niet bij auenturen en warde versumet als ic sal comen ende neder climmen tot v.

4

Mer sij hebben ghesent tot mij na desen woerden vierwerf: ende ic heb hem geantwordt na die eerste reden.

5

Ende sanaballath heeft tot mij ghesent na deerste woort die vijfte reise sijnen knecht: ende had enen sendtbrief in sijn hant

6

ghescreuen in deser manieren. Onder den volken is ghehoert: ende gosen heeft geseit. dat du ende die ioden denct te rebelleeren. ende daer

[p. *111]

om timmers du die mure: ende wilste di op boeren op hem een coninc:

7

ende om dese saec hebstu oec gheset propheten die van dij prediken sullen in iherusalem segghende. Hi is coninc in iudea Die coninc sal hoeren dese woerden. Daer om bin ic nv ghecomen: dat wij tsamen ingaen enen raet.

8

Ende ic heb ghesent tot hem segghende. Ten is niet ghesciet na desen woerden die du spreecste. Want van dijnre herten versierstu dese woerden.

9

Want alle dese veruaerden ons: denckende dat onse handen souden oflaten vanden werc ende wij souden rusten. Om dese saec heb ic meer ghestarct mijn handen.

10

Ende bin inghegaen heimelic int huys samaie die soon was dalaie. die soon was methabehel. Ende die heeft gheseit. Laet ons tracteeren onder ons in den huse gods int middel des tempels. ende laet ons sluten die poorten des huyses: want si sullen comen om di te doden: ende in der nacht sullen sij comen om dij doot te slaen.

11

Ende ic heb gheseit. Heeft yemant mijns ghelijc gheuloghen? Ende wie als ic is inghegaen in den tempel ende sal leuen? Ic en sal niet ingaen.

12

Ende ic heb verstaen dat god hem niet ghesent en had: mer als propheterende heeft hij ghesproken tot mij: ende dat thobias ende sanaballath hem ghehuert hadden.

13

Want hij had loon om dat ic veruaert soude doen ende sondighen: ende si souden hebben quaet dat sij mij verwijten mochten.

14

Heer ghedenct mijns voer tobia ende sanaballath na hoer sulke werken: mer oec noadie des propheten ende der andere propheten die mij veruaerden.

15

Mer die muer is volbracht in den vijf en twintichsten dach der maent elul. in twe ende vijftich daghen.

16

Hier om ist ghesciet doe al onse vianden hadden ghehoert dat alle volken die in onsen omganc waren ons ontsaghen ende worden verslaghen in hem seluen: ende wisten dat vanden heer dit werc ghedaen is.

17

Mer oec in dien daghen worden veel brieuen ghesent vanden oppersten der ioden tot thobiam: ende van thobia quamen tot hem.

18

Want veel waren in iudeen dien hij ghezworen had: want hi was een: swagher sechenie die soon was iorei ende iohannan sijn soon had ghenomen een dochter mesollam die soon was barachie.

19

Mer oec presen sij hem voer mij: ende mijn woerden boetscapten sij hem Ende thobias sende brieuen om mi te veruaren.