Bible in duytsche (Delftse bijbel 1477)

§ Ca .v.

1

ENde daer is gheworden een grote roepinghe des volcs ende hore wijuen: teghen die ioden hoer broedeeen.

2

Ende daer waren sommighe die seiden. Onse sonen ende onse dochteren sijn seer veel. Laet ons nemen om tghelt van hem tarwe: ende laet ons eten ende leuen.

3

Ende sommighe waren die seiden. Laet ons teghen setten ons ackeren ende wijngaerden ende onse husen: ende laet ons nemen tarwe in den hongher.

4

Ende andere seyden. Laet ons nemen ghelt te leen totten tijnsen des conincs: ende laet ons gheuen onse ackeren ende wijngaerden.

5

Ende nv als die lichamen onser broederen. so sijn onse lichamen: ende als hoer sonen alsoe sijn oec onse sonen. Siet wi onderwerpen onse sonen ende onse dochteren in een eyghendom: ende van onse dochteren sijn dienstmaechden. ende wij en hebben niet waer van si ghelost moghen worden: ende andere lude besitten onse ackeren ende wijngaerden.

6

Ende ic bin seer toornich gheworden: doe ic ghehoert had hoer ropen na desen woerden.

7

Ende mijn hert heeft ghedocht. Ende ic heb berispt ende ghestraft die opperste ende meesteren: ende heb hem gheseit. Suldij woeker eysschen een yeghelic van uwen broederen? Ende ic heb vergadert teghen hem een grote scare:

8

ende ic heb hem gheseit Wij hebben ghelost ende weder ghecocht onse broederen die ioden als ghi wetet die vercocht waren den heidenen na onser macht. Ende hier om vercoept ghi oec onse broederen: ende wij sullense lossen? Ende si hebben ghesweghen: ende en hebben niet gheuonden wat si antwoorden souden.

9

Ende ic heb tot hem geseit. Ten is gheen goet dinc dat ghij doet. Waer om en wandert ghi niet in den anxte onses gods: op dat ons niet verweten en wordt vanden heiden onsen vianden?

10

Ende ic ende mijn broederen. ende mijn knechten hebben gheleent veel menschen ghelt ende tarwe. Laet ons niet weder eyschen dit int ghemeen. Laet ons lenen vreemde ghelt: datmen ons sculdich is.

11

Gheeft hem huden weder hoer ackeren: ende hoer wijngaerden. ende hoer steden der olijuen. ende hoer husen. Mer oec meer dat honderste deel des gheldes tarwes wijns ende olijs dat

[p. *110]

ghi pleecht te eyschen van hem: gheeft voer hem.

12

Ende si hebben gheseit: Wij sullen wedergheuen: ende sullen niet begheren van hem: ende wij sullen alsoe doen als du spreecste. Ende ic heb gheropen die priesteren: ende heb die besworen dat sij doen souden na dat ic gheseit had.

13

Voert meer heb ic wt ghescudt mijnen scoot. ende heb gheseit. Alsoe moet god wt scudden alle man die niet en veruolt dit woert: van sijnen huse ende van sijnen arbeiden. Also moet worden wtghescudt: ende ydel worden. Ende al die scaer heeft gheseit amen. Ende hebben gheloeft god. Hier om heeft tvolc gedaen als daer was geseit.

14

Mer van dien daghe die mi die coninc gheboden had dat ic wesen soude een hertoech in den lande iuda van twintichste iaer hent totten twe ende dertichste iaer artarxersis des conincs twalf iaer lanc: ic ende mijn broederen hebben niet ghegheuen die iaerlicse renten die men sculdich was den hertoghen.

15

Mer die eerste hertoghen die gheweest hebben voer mij hebben beswaert tvolc: ende hebben ghenomen van hem in broot ende wijn ende in ghelt daghelics viertich siclen. Mer oec hoer dienre hadden verdrucht tvolc. Mer ic en heb so niet gedaen om den anxt gods.

16

Ende ymmer ghetimmert in den werc der muren: ende gheen acker en heb ic ghecocht: ende al mijn kijnderen waren vergadert totten werc.

17

Ende die ioden ende meesterscappen. hondert ende vijftich mannen. ende die ghecomen waren tot ons vanden heidenen die in onsen omganc sijn: waren in onser tafelen.

18

Mij wort bereit in allen daghen een os. ende ses wtuercoren rammen. wtghenomen den voghelen: ende tusschen tien daghen menigherlei wijnen: ende ic gaf veel andere dinghen. Ende voert meer en heb ic niet begheert iaerlicse renten mijns hertochdoms. Want tvolc was seer vermynret

19

Mijn god ghedenc mijns int goede: na al den dinghen die ic ghedaen heb desen volc