Bible in duytsche (Delftse bijbel 1477)

§ Capittel .iiij.

1

MEr het is ghesciet doe sanaballath gehoert had dat wi die mure timmerden was hij seer toornich. Ende beroert seer. heeft bespot die ioden:

2

ende heeft gheseit bij sijnen broederen ende een grote menichte der samaritanen. Wat doen die cranke ioden? Sullen die heiden hem laten timmeren? Sullen si sacrifici doen. ende veruollen in enen daghe? Moghen si timmeren stenen van asch hopen. die verbarnt sijn?

3

Mer oec tobias amanites sijn naeste heeft gheseit. Laetse timmeren. Ist sake dat een vos opclimt: hi sal ouerspringhen hoer stenen muer.

4

Hoert onse god want wi sijn gheworden versmadinge Keer onsen laster op hoer hoeft: ende gheeftse inversmadenisse int lant der vanghenis.

5

En dect niet hoer boesheit: ende hoer sonde en moet niet worden of gedaen voer dijn aensicht: want si bespot hebben die gheen die timmeren.

6

Daer om hebben wi ghetimmert die mure ende die al tsamen geuoecht hent totten haluen deel: ende thert des volcs is verwect tot werken.

7

Mer het is ghesciet doe sanaballath had ghehoert. ende tobias ende die van arabien ende amaniten ende die van azoten dat die scoer der muren iherusalem was omleit. ende dat die onderscooringhe begonnen tsamen te sluten: waren si seer toornich.

8

Ende sijn al tsamen vergadert om te comen ende te striden teghen iherusalem: ende om laghen te legghen.

9

Ende wij hebben onsen god gebeden ende wi hebben gheset wachteren op die muer dach ende nacht tegen hem.

10

Mer iudas heeft gheseit. Die starcheit des draghers is cranc gheworden: ende die aerde is seer groot: ende wij en sullen niet moghen timmeren die muer.

11

Ende onse vianden hebben gheseit. Si en moetent niet weten tot dat wij comen int middel van hem. ende slaense doot: ende doen twerc ophouden

12

Mer het is ghesciet dat die ioden quamen die woenden bi hem ende seident ons tienwerf wt allen steden daer sij doer quamen tot ons:

13

ende ic heb gheset in die stede achter die mure in den omganc. volc in ordinancien mit horen swaerden glauien ende boghen.

14

Ende ic heb doersien ende bin op ghestaen: ende seide totten oppersten ende meesteren. ende tot dat ander deel des ghemeens Wilt niet ontsien van hoer aensicht Ghedenct des groten heren ende veruaerlic: ende vecht voer v broederen v sonen: ende v dochteren. ende v wijuen. ende v husen.

15

Mer het is ghesciet doe onse vianden hadden ghehoert dat ons ghebootscapt was: heeft god destrueert horen raet. Ende wij sijn alle weder ghekeert totten muren: een yeghelic tot sijn werc.

16

Ende het is ghesciet in dien daghe: dat halue deel der ionghelingen deden hoer werc. ende die ander helft was bereet ten strijde: ende glauien. ende scilden. ende boghen. ende panseren: ende princen after hem in allen husen iuda

17

der gheenre die timmerden muren: ende droeghen lasten ende opleiden. Mitter eenre hant dede hi sijn werc: ende mit der ander hielt hi tswaert.

18

Want een yeghelic der timmerluden was ghe-

[p. *109]

gordt mit een swaert op sijn nieren. Ende si timmerden ende maecten gheluyt mit basunen bij mi.

19

Ende ic heb gheseit totten oppersten ende den meesteren ende tot dat ander deel des ghemeents. Dit werc is groot ende breet: ende wij sijn versceiden inder muren verre van malcandere.

20

In wat stede ghi sult horen tgheluyt der trompetten: dairwart loept tsamen tot ons. Onse god sal vechten voer ons:

21

ende wi sullen doen twerc. Ende dat halue deel onser sal houden glauien van den opganc der dagheraet tot dat die sterren scijnen.

22

Ende in diere tijt heb ic gheseit den volc. Een yeghelic mit sijn knecht moet blijuen int middel iherusalem: ende ghi sult werken bij boerten nacht ende dach.

23

Mer ic ende mijn broederen ende mijn kinderen. ende bewaerres die achter mi waren: en leiden niet of onse clederen. Een yeghelic wort alleen bloet ghemaect totten doopsel