Bible in duytsche (Delftse bijbel 1477)

§ Capit .iij.

1

ENde eliasib die grote priester is op ghestaen. ende sijn broederen priesteren: ende hebben ghetimmert die poorte der scaren. Si hebbense gheheilicht: ende gheset hoer doeren: tot den toren van hondert cubiten. si hebben die gheheilicht: totten toren ananehel

2

Ende bij hem hebben ghetimmert die mannen van iherico: ende bi hem heeft ghetimmert zacchur een zoon amri.

3

Mer die poorte der visschen hebben ghetimmert die sonen asnaa: si hebben die ghedect. ende hebben gheset hoer doeren. ende sloten ende grendelen

4

Ende bij hem heeft ghetimmert marimuth: een soon vrie. die soon accus. Ende bi hem heeft ghetimmert mosollam een soon barachie. die soon was mesezehel. Ende bij hem heeft ghetimmert sadoch een soon baana.

5

Ende bi hem hebben ghetimmert die thecueni. Mer hoer opperste en hebben hoer halsen niet onder gheset in den werc des heren hoers gods

6

Ende die oude poort hebben ghetimmert ioiada een soon phasea. ende mosollam een soon besodia: sij hebbense ghedect: ende gheset hoer doeren. ende sloten ende grendelen.

7

Ende bi hem hebben ghetimmert melchias gabaonites. ende iadon meronathites. mannen van gabaon ende maspha: voer den hertoech die was int lant ouer die riuier.

8

Ende bi hem heeft ghetimmert ezihel een soon araia. ende goutsmit. Ende bi hem heeft ghetimmert ananias eens aptekers soon: ende hebben ghelaten iherusalem hent tot die muer der breder straten.

9

Ende bi hem heeft ghetimmert raphaia een soon ahur prince des steghes iherusalem.

10

Ende bij hem heeft ghetimmert ieiada een soon aromath: teghen sijn huys. Ende bi hem heeft ghetimmert atthus een soon asebonie

11

Dat halue deel des steghes heeft ghetimmert melchias een soon erem. ende asub een soon phethmoab: ende den toren der ouenen.

12

Ende bi hem heeft ghetimmert sellum een soon aloes. prince des haluen deels der steghen iherusalem: osee ende sijn sonen

13

Ende die poort des dals heeft ghetimmert annun ende die woonres zanoe: si hebben die ghetimmert: ende gheset hoer doeren ende sloten ende grendelen: ende dusent cubiten in die mure hent totter poorte des drecs.

14

Ende die poorte

[p. *107]

des drecs heeft ghetimmert melchias een soon rechab: prins der steghen betacharen. Hi heeft die ghetimmert: ende gheset hoer doren ende sloten ende grendelen.

15

Ende die poort des fonteins heeft ghetimmert sellum een soon colozai: prince des dorps maspha. Hi heeft die ghetimmert ende ghedect: ende heeft gheset hoer doeren ende sloten ende grendelen: ende die muren ders piscijnen syloe in des conincs hof. ende hent totten graden die neder climmen vander stat dauid.

16

Na hem heeft ghetimmert neemias een soon azboch een prince des haluen deels des dorps bethsur tot teghen tgraf dauid: ende tot die piscijn die mit groten werc ghetimmert is. ende tot den huse der stercken.

17

Na hem hebben ghetimmert die leuiten: reum een soon benni Na die heeft ghetimmert asobias prince des haluen deels des dorps ceile: in sijn steghe.

18

Na hem hebben ghetimmert hoer broederen: bechui een zoon enedad prince des haluen deels ceile.

19

Ende bij hem heeft ghetimmert azer een soon iosue ende prince maspha die anderde maet: teghen die opclimminghe des starcken hoics.

20

Na hem inden berch heeft ghetimmert. baruch een soon zachai die anderde maet: vanden hoic totter poorten shuys eliasib des groots priesters

21

Na hem heeft ghetimmet merimuth een soon vrie. die soon was atthus die anderde maet vander poorten des huys eliasib: also verre als stercte thuys eliasib.

22

Ende na hem hebben ghetimmert die priesteren: mannen vanden velden des ioerdaens.

23

Na hem heeft ghetimmert beniamin ende asub: teghen sijn huys. Ende na die heeft ghetimmert azarias een soon maasie die soon was ananie: teghen sijn huys.

24

Na hem heeft ghetimmert bennui een soon ennada. die anderde maet. vanden huse azarie tot dat buyghen. ende totten hoec.

25

Na hem heeft ghetimmert phalel een soon ozi. teghen die buyghinghe ende den toirn die wtscijnt vanden hoghen huys des conincs dat is inden sael des karkers Na hem phadaia een soon feros.

26

Mer die subdiaken woenden in ofel. hent teghen die poorte der wateren totten oosten ende den toren die verre wtscheen

27

Na dien hebben ghetimmert thecueni die anderde maet daer teghen: vanden groten toirn ende wtscnijende. hent tot die muer des tempels.

28

Mer opwaerts tot die poorte der paerden hebben ghetimmert die priesteren: een yghelic teghen sijn huys.

29

Na hem heeft ghetimmert seddo een soon emmer: teghen sijn huys. Ende na hem heeft ghetimmert semeia een soon sechenie: bewaerre der oostersche poorten.

30

Na hem hebben ghetimmert anania een soon selemie. ende anon die seste soon selo: die anderde maet. Na hem heeft ghetimmert mesollam een soon barachie teghen sijn scatcamer. Na hem heeft ghetimmert melchias eens goutsmits soon. hent totten huse der subdiaconen. ende der gheenre die scilde vercopen. teghen die poorte des rechts. ende totten sael des hoecs.

31

Ende tusschen den sael des hoics in die poorte des scaers hebben ghetimmert die wercmeesteren ende

[p. *108]

coopluden