Bible in duytsche (Delftse bijbel 1477)

§ Capittel .ij.

1

ENde het is ghesciet inder maent nisan. in twintichste iaer des conincs artarxersis: ende wijn was voer hem. Ende ic heb den wijn opgheboert ende den coninc ghegheuen: ende ic was als een siec

[p. *105]

mensche voer sijn aensicht.

2

Ende die coninc heeft mi geseit Waer om is dijn aensicht droeuich. na dien dat ic dij niet siec en sie? Dat en is niet te vergheefs: mer quaet is in dijnre herten ic en weet niet wat. Ende ic heb seer ontsien:

3

ende heb gheseit den coninc. Coninc leue inder ewicheit. Waer om en soude niet droeuich sijn mijn aensicht: want die stat thuys der grauen mijns vaders is ghelaten. ende hoer poorten sijn verbarnt mitten vier?

4

Ende die coninc seide mij Om wat dinc bidstu? Ende ic heb ghebeden god shemels:

5

ende heb gheseit totten coninc Ist sake dat den coninc goet duuct. ende dijn knecht behaghet voer dijn aensicht: dattu sendste mi in iudeam tot die stat des graues mijns vaders: ende ic sal die timmeren.

6

Ende die coninc heeft mij gheseit Ende die coninghinne die bij hem sat. Tot wat tijt sal dijn wech sijn. ende wanneer sulstu weder comen? Ende het behaechden voer den aensicht des conincs: ende hi heeft mij ghesent. Ende ic heb hem gheset een tijt:

7

ende heb gheseit den coninc. Ist sake dat den coninc goet dunct. hij gheef mij brieuen totten hertoghen des lants ouer die riuier. dat si mij ouerleiden tot dat ic sal comen in iudeam:

8

ende een sendebrief tot asaph den bewaere des conincs bosch. dat hi mi gheue houten: dat ic decken mach die poorten des tempels toornen husen ende muren des stats. ende thuys daer ic ingaen sal. Ende die coninc heeft mij ghegeuen: na die hant mijns gods goet mit mij.

9

Ende ic bin ghecomen tot die hertoghen des lants ouer die riuier: ende ic heb hem ghegheuen die brieuen des conincs. Mer die coninc had mit mij ghesent princen der ridderen. ende rijders.

10

Ende sanaballath oronites. ende tobias knecht amanites. hebben ghehoert. ende sijn bedroeft mit groter castiinghe: dat ghecomen was een man die sochte gheluc der sonen israhel.

11

Ende ic bin ghecomen tot iherusalem: ende was daer drie daghen.

12

Ende ic bin opgestaen inder nacht ende wenich mannen mit mij: ende ic en heb niet te kennen ghegheuen yemant wat die heer ghegheuen had in mijnre herten dat ic doen soude in iherusalem: ende gheen beest en was mit mij. dan daer ic op sat.

13

Ende ic bin wtghegaen doer die poorte des dals inder nacht. ende voer die fontein des drakes. ende vander poorten des drecs: ende ic mercte die mure iherusalem verderft: ende die poorten verteert mit vier

14

Ende ic bin ouer ghegaen tot die poort der fonteinen: ende tot die sijl des conincs ende gheen stede en was: mijn beest daer ic op sat. om ouer te gaen.

15

Ende ic ben op gheclommen doer die beec in der nacht. ende mercte die mure: ende bin weder gecomen tot die poorte des dals. ende bin weder om ghegaen.

16

Mer die meesteren ende die opperste wisten niet waer dat ic ghegaen was: of wat ic doen soude. Mer oec den ioden. ende priesteren ende den oppersten ende meesterscap ende den anderen die twerc deden. hent tot diere stede en had ic niet openbaert.

17

Ende heb hem gheseit. Ghi weet die castiinghe daer wij in sijn: want iherusalem is ghelaten ende sijn poorten

[p. *106]

sijn verteert mitten vier. Coemt ende laet ons timmeren die muren iherusalem: ende laet ons voert an niet sijn een laster ende scande.

18

Ende ic heb hem gheopenbaert die hant mijns gods: dat sij goet was mit mij: ende die woerden des conincs die hi mi ghesproken heeft: ende ic segghe. Laet ons opstaen: ende laet ons timmeren. Ende hoer handen sijn ghesterct in goet.

19

Mer sanaballath oronites. ende tobias knecht amanites. ende gosem van arabien. hebben gehoert ende hebben ons bespot: ende versmaden ons: ende hebben gheseit. Welc is dit dinc dat ghi doet? En rebelleert ghi niet tegen den coninc?

20

Ende ic heb hem weder geantwoert: ende heb gheseit tot hem. God des hemels die helpt ons: ende wi sijn. sijn knechten. Laet ons opstaen: ende laet ons timmeren. Mer v en is geen deel noch rechtuaerdicheit noch ghehoechnisse in iherusalem.