Bible in duytsche (Delftse bijbel 1477)

[1]

1

DIe woerden neemie eens soons helchie. Ende het is ghesciet in der maent casleu. in twintichste iaer: ende ic was int casteel susis.

2

Ende anani een van mijnen broederen is ghecomen. hij ende die mannen iuda. ende ic heb hem ghevraecht van den ioden. die ghebleuen waren ende noch leefden vander vangnisse ende van iherusalem.

3

Ende sij hebben mij gheseit. Die ghebleuen sijn ende achter ghelaten sijn vander vangnisse daer in die prouinci. sijn in groten verdriet ende laster: ende die muer iherusalem is destruert. ende sijn poorten sijn verbarnt mit viere.

4

Ende doe ic hoerde aldusdanighe woerden. heb ic gheseten ende ghescreit. ende heb ghescreit veel daghen ende ic vaste ende bat voert aensicht gods des hemels:

5

ende ic heb gheseit. Ic bid heer god shemels starc groot ende veruaerlic. die bewaerste vorwaerd ende bermherticheit mitten ghenen die dij liefhebben. ende bewaren dijn gheboden:

6

dijn oren moeten toe horen. ende dijn oghen opghedaen. dattu hoerste tghebet dijns knechtes. welc ic bidde voer dij huden nacht ende dach. voer die sonen israhel dijnen knechten: ende belie voer die sonden der sonen israhel mit welken sij dij ghesondicht hebben. Ende ic ende thuys mijns vaders hebben ghesondicht:

7

wij sijn bedroghen mit idelheit: ende en hebben niet bewaert dijn ghebot. ende cerimonien ende oerdelen die du gheboden hebste moysi dijnen knechte.

8

Ghedenct des woerds: dattu gheboden hebste moysi dijnen knecht segghende. Wanneer ghi ouerghetreden sijt sal ic v verderuen onder den volken:

9

ende ist sake dat ghi wederkeert tot mij ende bewaert mijn ghebode ende doet die. al waer dij ofgheleit tot die wterste des hemels ic sal v van daer vergaderen: ende weder leiden in die stede die ic vercoren heb dat mijn naem daer wonen sal.

10

Ende sij sijn dijn knechten ende dijn volc: die du verlost hebste in dijnre groter starcheit. ende in dijnre starker hant.

11

Ic bid heer dijn oer moet aenmerken tot tghebet dijns knechtes ende tot dat ghebet dijnre knechten die ontsien wilen dijnen naem: ende scicke dijnen knecht huden: ende gheeft hem barmherticheit voer desen man. Want ic was scenker des conincs.