Bible in duytsche (Delftse bijbel 1477)

§ Capittel .ix.

1

DOe dese dinghen veruolt waren: sijn toeghegaen tot mij die princen segghende. Tvolc israhel is niet ghesceiden ende die priesteren ende leuiten van den volken der landen. ende van horen versmadinghen: als chananei ende ethei. ende pheresei ende iebuzei. ende der ammoniten ende moabiten ende van egipten ende amorreen

2

Want si hebben ghenomen van horen dochteren hem ende horen sonen: ende hebben ghemengt dat heilighe saet mitten volken der aerden. Ende die hant der princen ende meesteren heeft gheweest die eerste in deser ouertredinghe.

3

Ende doe ic hoerde dese reden. heb ic ghesneden mijnen mantel ende rock: ende heb wt ghetoghen die haren mijns hoofdes ende mijns baerdes: ende heb gheseten droeuich.

4

Mer tot mij sijn tsamen ghecomen alle die ontsaghen twoert gods israhel. om die ouertredinghe der gheenre die ghecomen waren vander vangnisse: ende ic sat droeuich tot die offerhande des auonts.

5

Ende in die auontlike offerhande bin ic op ghestaen van mijnre castiinghe: ende mijnen mantel ghescoort wesende ende rock heb ic ghecromt mijn knijen. ende wtgherect mijnen handen totten heer mijnen god

6

segghende. Mijn god ic warde verstoort ende scaem mij op te boeren mijn aensicht tot dij: want onse sonden sijn vermenichuoudicht op ons hooft: ende onse sonden sijn ghewassen hent totten hemel

7

van den daghen onser vaderen. Mer oec wij seluen hebben swaerlike ghesondicht tot desen daghe: ende in onsen boosheiden sijn wij seluen ouer ghegheuen ende onse coninghen ende onse priesteren in hande der coninghen der aerden: ende in swaert ende in vanghenisse ende in roof ende in bescamenisse des aensichtes: als oec in desen daghe.

8

Ende nv als een wenich ende tot een moment is gheworden ons ghebet bijden heer onsen god. dat ons ghelaten souden werden die ghebleuen waren. ende sijn vrede soude worden ghegeuen in sijn heilighe stede: ende onse god soude verlichten onse oghen. ende gheuen ons een cleyn leuen in onsen eyghendom.

9

want wij eighen knechten sijn: ende onse god heeft ons niet ghelaten in onsen eyghendom: ende heeft gheneicht op ons barmherticheit voer den coninc van persen. dat hi ons soude gheuen tleuen ende verhoghen thuys ons gods. ende timmeren sijn woeste steden ende gheuen ons hoop in iuda ende iherusalem.

10

Ende nv heer onsen god wat sullen wij segghen na desen? Want wij hebben ghelaten dijn gheboden.

11

die du gheboden hebste in die hant dijnre knechten der propheten segghende. Tlant tot welken ghi ingaet om dat te besitten is een onrein lant na die onreinicheit der volken ende der andere landen: mit horen onmenschelicheiden die dat veruolt hebben van monde

[p. *102]

tot mondt in hore besmittinghe

12

Hier om nv wilt niet gheuen uwe dochteren horen sonen. ende hoer dochteren en neemt niet uwe sonen: ende niet en begheert horen vrede noch hoer gheluc inder ewicheit: op dat ghi wort ghestarct ende sult eten die vruchten der aerden die goet sijn. ende sult hebben uwe sonen erfghenamen inder ewicheit

13

Ende na al desen die ghecomen sijn op ons in onsen quaden werken. ende in onser groter misdaet: want du onse god ons verlost hebste van onser boesheit. ende hebste ons ghegeuen salicheit als is huden:

14

op dat wij niet verkeert en soude worden ende maken dijn gheboden te niet. noch hijliken mitten wolken deser onmenschelicheden. Sij dij ons toornich gheworden totter volbrenghinghe: om ons niet te laten ouerbliuinghe: tot salicheit?

15

Heer god israhel du biste rechtuaerdich: want wi ghelaten sijn die behouden sullen worden als in desen daghe. Siet voer dij sijn wij in onser misdaet. Want voer dij en mach men niet staen van dien