Bible in duytsche (Delftse bijbel 1477)

§ Capittel .viij.

1

HIer om dese sijn die princen der familien. ende hoer gheslachte die mit mij sijn op gheclommen: in den rijke artarxersis conincs van babilonien.

2

Van den sonen finees: gerson. Van den sonen ythamar: daniel. Van den sonen dauid: attus.

3

Van den sonen sechenie. ende vanden sonen pharos zacharias: ende mit hem sijn ghetelt hondert ende vijftich mannen.

4

Van den sonen phetmoab. helioenai een soon zaree: ende mit hem twehondert mannen.

5

Van den sonen sechenie die soon ezechiel: ende mit hem drie honderrt mannen.

6

Van den sonen addan. nabeth een soon ionathan: ende mit hem vijftich mannen.

7

Vanden sonen helam. ysaias een soon athalie: ende mit hem tseuentich mannen.

8

Vanden sonen saphatie. zebedia een soon michael: ende mit hem tachtich mannen.

9

Vanden sonen ioab. obedia een soon iheihel: ende mit hem twe hondert ende achtien mannen.

10

Vanden sonen selomith. die soon iosphie: ende mit hem hondert ende tsestich mannen.

11

Vanden sonen bebai. zacharias een soon bebai: ende mit hem acht ende twintich mannen.

12

Van den sonen ezeab. iohannam een soon ezethan: ende mit hem hondert ende tien mannen.

13

Van den sonen adonicam. die waren die leste. ende dit waren hoer namen. heliphelet. ende heihel. ende samaias: ende mit hem tsestich mannen.

14

Vanden sonen beggui uthai. ende zachur: ende mit hem tseuentich mannen.

15

Ende ic hebse vergadert tot die riuier. die loopt adhauua: ende wij sijn daer ghebleuen drie daghen. Ende ic heb ghesocht onder den volc. ende onder den priesteren vanden sonen leui: ende ic en hebse daer niet gheuonden.

16

Hier om heb ic ghesendt heliezer ende ariel ende semeam ende helnathan. ende arib ende den anderen helnathan ende nathan. ende zachariam. ende mesolam. princen ende ioarib. ende helnathan wijse mannen:

17

ende heb die ghesent tot heddo die deerste is inder stede casphie. Ende ic heb gheset in hoeren mont woerden die si spreken souden tot heddo. ende tot sijnen broederen subdyaconen in der stede casphie: dat si ons toeleiden souden dienres shuys ons gods.

18

Ende si hebben ons toegheleidt doer die hant ons gods

[p. *100]

goet op ons enen seer gheleerden man van den sonen mooli. die soon was leui eens soons israhel: ende sarabiam. ende sijn sonen ende sijn broederen achtien.

19

ende asabiam. ende mit hem ysaiam van den sonen merari: ende sijn broederen ende sonen twintich.

20

Ende vanden subdiaconen die dauid ghegheuen had. ende die princen totten diensten der leuiten: twehondert ende twintich subdiakenen. Alle dese worden ghenoemt mit horen namen

21

Ende ic heb daer ghepredict vasten bij die riuier adhauua: dat wij ghepijnt worden voer den heer onsen god. ende bidden souden van hem den rechten wech ons: ende onsen kinderen. ende al onsen goede.

22

Want ic scaemde my te bidden den coninc om hulp ende rijders. die ons bescermen souden in den weghe van onse viant: om dat wi gheseit hadden den coninc. Die hant ons gods is op alle menschen die hem soeken in goetheit. ende sijn ghebot. ende sijn stercheit. ende sijn toirn is op allen die hem laten.

23

Ende wij hebben gheuast ende ghebeden onsen god om dat: ende tis ons gheuallen voer spoedelic.

24

Ende ic heb ghesceiden van den princen der priesteren twaelf. sarabiam ende asabiam: ende mit hem van hoeren broederen tien.

25

Ende ic heb hem gheweghen siluer ende gout. ende gheheilichde vaten shuys ons gods. die gheoffert had die coninc. ende sijn raedsmannen. ende sijn princen: ende al israhel der gheenre die gheuonden waren

26

Ende heb gheweghen in horen handen seshondert ende vijftich pondt siluers ende hondert silueten vaten: hondert pondt gouds.

27

ende twintich gouden croesen die hadden dusent scellinghe: ende twe vaten des alre besten copers blenckende scoon als gout.

28

Ende ic heb hem gheseit. Ghi sijt heilighe des heren. ende heilighe vaten: ende siluer ende gout dat mit wil gheoffert is den heer god onser vaderen.

29

Waect ende bewaert: tot dat ghijt brengt voer den princen der priesteren. ende der leuiten. ende voer den hertoghen der familien israhel in iherusalem. in den scat des heren huys.

30

Ende die priesteren ende leuiten hebben ghenomen tghewicht siluers ende gouds. ende der vaten: om te brenghen tot iherusalem. in den huse ons gods.

31

Daer om hebben wij ons gheroert vander riuier adhauua op den twaelften dach der eerster maent: om te reisen tot iherusalem. Ende die hant ons gods heeft gheweest op ons: ende heeft ons verlost van der hant des viants ende des laghelegghers in den wech.

32

Ende wij sijn ghecomen tot iherusalem: ende bleuen daer drie daghen.

33

Mrr inden vierden dach is gheweghen tsiluer ende gout ende vaten in den huse ons gods doer die hant remoth die soon was vrije des priesters: ende mit hem eleazar een soon finees. ende mit hem iozaded een soon iosue ende noadaia een soon bennoi leuite:

34

nae tghetal ende ghewicht al der dinghen. In diere tijt is bescreuen. al tghe wicht.

35

Mer oec die ghecomen waren van der vangnisse sonen der ouerwanderinghe hebben gheoffert god israhel ghebarnde offerhanden twalf calueren voer al tvolc israhel: ses ende tneghentich rammen. seuen ende

[p. *101]

tseuentich lammeren. twaelf bocken voer die sonde. al in een offerhande den heer.

36

Ende si hebben ghegheuen die gheboden des conincs den princen die waren van den aenscijn des conincs. ende den hertoghen ouer die riuier: ende hebben opgheboert tvolc ende thuys gods