Bible in duytsche (Delftse bijbel 1477)

§ Capit .vij

1

NAe desen woerden int rijc artarxersis conincs van persen. esdras een soon saraie die soon was azarie. die soon was helchie.

2

die soon was sellum. die soon was sadoch. die soon was achitob.

3

die soon was amarie. die soon was azarie. die soon was maraioth.

4

die soon was zarie. die soon was ozi die soon was bocci.

5

die soon was abisue. die soon was finees. die soon was eleasar. die soon was aaron des priesters van beghin:

6

dese esdras is opgheclommen van babilonien: ende hij was een meester snel inder wet moysi. die god die heer ghegeuen heeft israhel. Ende die coninc heeft hem ghegheuen al sijn begheerte.na die goede

[p. *98]

hant des heren sijns gods op hem.

7

Ende sijn opgheclommen van den sonen israhel. en vanden sonen der priesteren. ende vanden sonen der leuiten. ende vanden sangheren. ende vanden doerwaderen. ende vanden subdiaconen. in iherusalem int seuende iaer artarxersis des conincs:

8

ende sijn ghecomen in iherusalem in die vijfte maent: dit is dat seuende iaer des conincs.

9

Want inden eersten daghe der eerster maent. heeft hi begonnen te climmen van babilonien: ende inden eersten daghe der vijfter maent is hij ghecomen in iherusalem. na der hant sijns gods goet op hem.

10

Mer esdras heeft bereit sijn hert. om te soeken die wet sheren: ende te doen ende te leren in israhel ghebot ende oerdeel.

11

Dit is dat exemplaer der epistolen des ghebodts: dat coninc atarxerses heeft ghegeuen esdre den priester. ende meester gheleert in den redenen ende gheboden sheren. ende in den hoochtijden sijns in israhel.

12

Artaxerses coninc der coninghen: esdre den priester ende alre gheleerste meester des wets gods des hemels. saluut

13

Van mi is gheboden: dat so wien behaghet in minen rijc vanden volc israhel. ende van sijnen priesteren. ende leuiten te gaen in iherusalem. die gae mit dij.

14

Want vanden aenscijn des conincs. ende seuen sijnre raetsluden bistu ghesent om te visiteren iudeam ende iherusalem. in die wet dijns gods die is in dijn hant:

15

ende om te brenghen siluer. ende gout dat die coninc ende sijn raetsluden willichlic gheoffert hebben god israhel: welcs tavernakel is in iherusalem.

16

Ende alle siluer ende gout. dat ghi vint in alle der prouincien van babilonien ende tvolc offeren wil: ende vanden priesteren die mit wil offeren den huse hoers gods dat is in iherusalem.

17

neemt vrijlic: ende coopt naerstelic van desen ghelde calueren. rammen lammeren. ende sacrificien ende hoer vochticheiden. ende offer die opt outaer des tempels uwes gods dat is in iherusalem.

18

Mer oec ist sake dat yet dij ende dijnen broederen behaechden vant ander siluer ende gout om te maken: maect na den wille uwes gods.

19

Ende die vaten die dij ghegeuen worden in den dienst shuys dijns gods: gheef inden aenscijn gods in iherusalem

20

Mer oec die andere dinghen die van node sijn int huys dijns gods: hoe veel het noot is dattu wtgheefste. sulstu gheuen van den scatte ende van die ghelt kiste des conincs.

21

ende van mij. Ic artarxerses coninc heb gheset ende gheboden. alden bewairren der ghemeenre kisten die sijn ouer die riuier dat so wat esdras priester ende meester des wets gods. shemels van v sal bidden. gheeft sonder merren.

22

hent tot hondert ponden siluers. ende tot hondert maten tarwes. ende tot hondert maten wijns. ende tot hondert maten olijs: mer soudt sonder maet.

23

Al dat behoert totten dienst gods shemels. moet worden ghegeuen naersteliken in den huse gods shemels: op dat hi niet toornich en warde teghen trijc des conincs. ende sijnre sonen.

24

Ende wij maken v bekent van al den priesteren ende leuiten. sanghers ende doerwaerders. subdiaken ende dienres. des huys

[p. *99]

gods: dat ghi gheen macht en hebt te setten op hem tol ende tribuut. ende iaerlike renten.

25

Mer du esdra. na die wijsheit dijns gods die is in dijnre hant set rechteren ende ouersten. om te rechten al tvolc dat ouer die riuier is: als die bekennen die wet dijns gods: mer oec leert vrijlic die ongheleerden.

26

Ende al man die niet en doet die wet dijns gods ende die wet des conincs naersteliken: oerdel sal sijn van hem of inden doot of in ghebannen te sijn. of in verboeringe sijns goeds: of inden kerker.

27

Ghebenedijt sij die heer god onser vaderen. die dat ghegeuen heeft int hert des conincs dat hi eeren wil thuys des heren welc is in iherusalem:

28

ende in mij gheneicht heeft sijn barmherticheit bij den coninc ende sijnen raedsmannen. ende al den machtighen princen des conincs. Ende ic ghesterct mitter hant sheren mijns gods die in mij was: heb vergadert van israhel die princen die mit mij op geclommen sijn.