Bible in duytsche (Delftse bijbel 1477)

§ Capittel .vi.

1

DOe heeft gheboden coninc darius: ende si hebben ghesocht in die librarie der boecken die waren in babilonien:

2

ende een boeck is gheuonden in ecbathanis dat is een casteel in medena prouincia: ende alsulken ghehoechnisse was daer in ghescreuen.

3

In den eersten iaer des conincs cyri heeft cirns gheboden dat thuys gods dat is in iherusalem soude worden ghetimmert in die stede daer men offert offerhande: ende dat si leggen sullen die fundamenten onder dragende die hoocheit tsestich cubiten. ende die breetheit tsestich cubiten:

4

drie ordinancien van onghepoleerden stenen: ende ordinancien van nyeuwen houten. Mer die costen sullen wordden ghegeuen van des conincs huse.

5

Mer oec die gouden vaten ende silueren des tempels gods. die nabuchodonosor had ghenomen van den tempel iherusalem ende die ghebrocht in babilonien moeten worden weder ghegeuen ende weder ghedraghen in den tempel iherusalem in hoer stede: die oec daer gheset sijn inden tempel gods

6

Hier om nu thantannai hertooch des lants dat is ouer die riuier ende starbuzannai ende v raetsluden apharsathei die sijt ouer die riuier gaet wech verre van hem:

7

ende laet den tempel gods worden ghemaect vanden hertoech der ioden ende van horen senioren: ende dat huys gods moet worden ghetimmert in sijn stede

8

Mer oec is van mi gheboden. dat moet ghescien van den priesteren der ioden op dat ghetimmert worde thuys gods: als dat vander arche des conincs dat is vanden tributen die worden ghegheuen van die lantscap ouer die riuier naerstelike die costen moeten worden ghegeuen den mannen: op dat twerc niet ghehindert en wort.

9

Ende oec ist sake dat van node is calueren ende lammeren ende ionghe bucken in een offerhande gode shemels: tarwe zout wijn ende oli na die gewoente der priesteren die sijn in iherusalem moet hem worden ghegheuen doer alle daghen. op dat gheen claghe en sijn in enighen dinghen:

10

ende si moeten offeren offerhanden god des hemels ende bidden voer tleuen des conincs ende sijnre sonen.

11

Hier om is van

[p. *97]

mij gheset een ghebot: dat alle mensche die dit ghebot verwandelde van sijnen huys moet werden ghenomen een hout ende worden op gherecht ende hi moet daer an worden gheuest: mer sijn huys moet werden ghemeen.

12

Ende god die sijnen naem heeft doen wonen daer: die moet verderuen alle rijken. ende tvolc dat sijn hant wt rect om te verderuen ende teghen te vechten thuys gods: dat is in iherusalem. Ic darius heb gheset een ghebot: dat ic wil naerstelike te worden veruolt.

13

Hier om thantannai hertoech des lants ouer die riuier ende starbuzannai. ende sijn raedsmannen na dat coninc darius gheboden had: so hebben sij dat naerstelike gheuolcht

14

Mer die senioren der ioden timmerden: ende hadden voerspoet na die propheci aggei des prophetes ende zacharie eens soons addo. Ende hebben ghetimmert god israhel ghebiedende. ende cyro ende dario. ende artarxerse den coninghen van persen ghebiedende:

15

ende hebben dit huys gods volbracht. totten derden daghe des maents adar: ende dat is tseste iaer des rijcs conincs darij.

16

Mer die sonen israhel priesteren ende leuiten. ende die andere der sonen der ouerwanderinghe. hebben ghemaect kermisse des huys gods in blijscappen:

17

ende hebben gheoffert in die kermisse des huys gods hondert calueren. twehondert rammen. vierhondert lammeren: ende twaelf bucken der gheiten voer die sonde al israhels nae tghetal der gheslachten israhel.

18

Ende hebben gheset priesteren in hoer ordinancien: ende leuiten in hoer boerten op die werken gods in iherusalem: als ghescreuen is int boeck moysi.

19

Mer die sonen der ouerwanderinghe hebben ghemaect paesschen inden veertienden dach des eersten maents.

20

Want die priesteren ende leuiten waren ghereinicht als een: al rein te offeren tpaeschlam al den sonen der ouerwanderinghe. ende horen broederen priesteren. ende hem seluen.

21

Ende die sonen israhel die wederom ghecomen waren vander ouerwanderinghe hebben ghegheten: ende al die hem seluen afsceiden van die besmittinghe der volken des lants tot hem: om te soeken den heer god israhel.

22

Ende hebben ghemaect hoochtijt der ongheghester brooden seuen daghen durende in vrolicheit. want die heer hem verblijt had: ende assur had sijn hert bekeert tot hem: om te helpen hoer handen int werc shuys des heren gods israhel