Bible in duytsche (Delftse bijbel 1477)
(2008)–Anoniem Bible in duytsche (Delftse bijbel 1477)–
Auteursrechtelijk beschermd1[4:6]MEr in den rijc assueri hi is arterxerses. int beghin sijn rijcs hebben si ghescreuen een wroeghing teghen die woenres iude ende iherusalem. | |
2[4:7]Ende inden daghen artarxersis heeft ghescreuen besellam mitridates ende tabeel. ende die andere die in horen raet waren tot artarxersen den coninc van persen: Mer die brief der wroeghinghe was ghescreuen na die tael der sieren: ende wort ghelesen in hoer tale. | |
3[4:8]Reumbeeltheem ende samsai scriba hebben ghescreuen enen sendebrief van iherusalem artarxersi den coninc in deser manieren | |
4[4:9]Reumbeeltheem ende samsai scriba ende andere hoir raedsmannen. dynei ende apharsathei therphalei. arphasei. herchuei. babilonij susannachei dyei. ende elamite. | |
5[4:10]ende alle die andere vanden volken die salmanaser groot ende glorioos heeft ouergheuoert: ende heeftse doen woonen in den steden van samarien. ende in anderen landen ouer die riuier in vreden. | |
6[4:11]Dit is een exemplaer der epistolen die si senden tot hem. Artarxersi den coninc: segghen dijn knechten mannen die sijn ouer die riuier gruet | |
7[4:12]Bekent si den coninc: want die ioden die opgheclommen sijn van dij tot ons sijn ghecomen in iherusalem een rebelle ende seer quade stat: die sij timmeren makende hore muren ende wanden. | |
8[4:13]Hier om nv sij bekent den coninc: want ist sake dat die stat ghetimmert waer ende hoer muren reformeert. so en sullen si niet gheuen tribuut noch tol noch iaerlike renten: ende dese scade sal comen totten coninghen. | |
9[4:14]Hier om wij ghedachtich des zouts dat wi ghegheten hebben int pallaes: want quetsinghe des conincs te sien rekenen wij sonde: daer om hebben wij ghesent ende gebootscapt den coninc. | |
10[4:15]dattu soecste inden boeken der historien uwer vaderen. ende du salste vinden ghescreuen inden registeren ende salte weten want die stat een rebel stat is ende scadende den coninghen ende prouincien ende in hoer worden strijden verwect van ouden dagen: ende daer om is die stat destrueert. | |
11[4:16]Wij bootscappen den coninc: want ist sake dat die stat ghetimmert waer. ende hoer muren reformeert: du en sulste niet hebben besittinghe ouer die riuier | |
12[4:17]Een woort heeft ghesent die coninc tot reumbeeltheem ende samsai scribam. ende totten anderen die in hoeren raet waren woenres van samarien. ende den anderen ouer die riuier: gruet segghende ende vrede. | |
13[4:18]Die wroeging die ghi tot ons ghesent hebt is openbaer ghelesen voer mij: | |
14[4:19]ende van mi is gheboden. ende si hebben ghesocht: ende hebben gheuonden want die stat van ouden daghen rebelleert teghen die coninghen: ende in hoer worden verwect twisten ende strijden. | |
15[4:20]Want oec seer sterke coninghen waren in iherusalem: die beheerden al tlant dat ouer die riuier is. Ende namen tijns tollen ende renten. | |
16[4:21]Hier om nv hoert den sin: dat ghi verbiet die mannen. ende dat die stat niet ghetimmert en warde: tot dat van mij ghesent sal worden. | |
17[4:22]Siet dat ghi niet versu- | |
[pagina *95]
| |
melic dat en veruolt: ende allenken tquaet wasse teghen die coninghen | |
18[4:23]Hier om is gelesen een wtscrift van des conincs artarxersis ghebot voir reumbeeltheem ende samsai scriba. ende horen raedsmannen: ende hebben haestelic ghegaen in iherusalem. totten ioden: ende hebben hem verboden mit macht ende stercheit | |
19[4:24]Doe is ofgelaten twerc shuys des heren in iherusalem: ende wort niet ghedaen hent totten anderden iaer des rijcs darii sconincs van persen |
|