Bible in duytsche (Delftse bijbel 1477)

§ Capittel .iij.

1

ENde te hant was ghecomen die seuende maent: ende die sonen israhel waren in horen steden. Hier om is vergadert tvolc als een man in iherusalem:

2

ende iosue soon iosedech is op ghestaen. ende sijn broederen priesteren. ende zorobabel soon salathiel. ende sijn broederen: ende hebben ghetimmert toutaer gods israhel. Om te offeren daer op verbarnde offerhanden: als ghescreuen is in die wet moysi smans gods.

3

Ende si hebben gheset toutaer gods op sijn fundamenten den volken der landen in hoeren omganc hem veruaerende: ende hebben gheoffert op dat outaer den heer olocaustum des morghen ende des auonts.

4

Ende hebben ghemaect hoochtijt der tabernaculen als ghescreuen is: ende ghebarnde offerhande in allen daghen doer die ordinancie na dat gheboden werc des

[p. *93]

daghes in sijnre tijt:

5

ende daer na ewich olocaustum also wel inden kalenden als in allen hoechtijden sheren die gheheilicht waren: ende in allen in welkenmit wille enich gaue gheoffert wort den heer.

6

Vanden eersten daghe der seuender maent: hebben sij begonnen te offeren den heer ghebarnde offerhanden. Mer die tempel gods en was noch niet fundeert.

7

Mer sij hebben ghelt ghegeuen den steenhouweren ende metselairen: ende spijs ende dranc ende olij die van sydonen ende tyren. om te brenghen cederboom houten van libano totter zee ioppen: na dat hem gheboden had cyrus coninc van persen.

8

Mer in danderde iaer hoers toecoomst totten tempel gods in iherusalem in danderde maent. hebben begonnen zorobabel soon salathiel ende iosue soon iosedech. ende die andere van horen broederen priesteren ende leuiten. ende alle die ghecomen waren vander vangenisse in iherusalem: ende hebben gheset leuiten van twintich iaren ende daer bouen om te regeeren twerc sheren:

9

Ende iosue heeft ghestaen ende sijn soenen ende sijn broederen. cedmihel ende sijn sonen. ende die sonen iuda als een man. dat si aenstaen soude op die gheen die twerc deden in den tempel gods: sonen enadab. ende hoer sonen. ende hoer broederen leuiten.

10

Hier om doe die tempel sheren fundeert was van die metselaers hebben ghestaen die priesteren mit horen clederen mit basunen: ende leuite sonen asaph in cimbalen: om te louen god doe die handen dauid des conincs israhel.

11

Ende sij songhen tsamen den heer in soeten sanghen ende belyinghe want hij goet is: want sijn barmherticheit is op israhel inder ewicheit. Ende al tvolc riep mit groten geluyt louende den heer: daer om dat die tempel sheren fundeert was.

12

Veel oec van den priesteren ende leuiten ende princen der vaderen ende senioren die ghesien hebben den tempel eerst doe hi fundeert was. ende dien tempel in horen oghen screiden mit groter stemmen: ende veel roepende in vrolicheit boerden op hoer stemme:

13

ende niemant mocht bekennen die stemme des roepens der gheenre die vrolic waren. ende die stemme des screyens des volcs. Ende te samen riep tvolc mit groten gheluyt: ende die stemme wort verre ghehoert

14[4:1]

Ende die vianden iude ende beniamin hebben ghehoert dat die sonen der vangenisse timmerde den heer god israhel enen tempel:

15[4:2]

ende toegaende tot zorobabel. ende totten princen der vaderen. hebben hem gheseit. Laet ons timmeren mit v: want als ghij. also soeken wij uwen god Siet wij hebben gheoffert offerhanden van den daghen assoraddan des conincs assur: die ons herwaert gheleet heeft

16[4:3]

Ende zorobabel ende iosue heeft hem gheseit: ende die ander princen der vaderen israhel. Ten hoert ons ende v niet toe dat wij timmeren een huys onsen god: mer wij seluen alleen sullen timmeren onsen god: als cyrus coninc van persen ons gheboden heeft.

17[4:4]

Hier om ist ghesciet dattet volc des lants hinderde die handen des volcs iude: ende verstoerden die int timmeren.

18[4:5]

Mer

[p. *94]

si hebben tegens hem gehuert raedsmannen om te verderuen horen raet in allen daghen cyry des conincs van persen