Bible in duytsche (Delftse bijbel 1477)

§ Capittel .xxxv.

1

IOsias heeft ghemaect den heer passchen in iherusalem: welc gheoffert is op den viertiensten dach der eerster maent.

2

Ende heeft gheset priesteren in hoeren diensten: ende heeft die vermaent dat sij dienen souden in den huys sheren.

3

Ende heeft oec ghesproken den leuiten tot welker leringhe al israhel wort gheheilicht den heer. Set die arke in die sanctuari des tempels: welc salomon dauids soon coninc israhel ghetimmert heeft. Want ghi en sultse voert an niet meer draghen Hier om dient nv den heer uwen god ende sijnen volc israhel:

4

ende bereet v doer v familien ende gheslachten in uwer alre deilinghe als gheboden heeft dauid den coninc israhel. ende salomon sijn soon bescreuen heeft:

5

ende dient in die sanctuari doer die familien ende scaren der leuiten:

6

ende geheilicht offert paesschen Ende bereit oec v broederen dat sij moghen doen na die woerden die ghesproken heeft die heer inder hant moysi

7

Ende voert meer heeft iosias ghegheuen al den volc dat daer gheuonden was inder hoochtijt van paesschen dertich dusent lammeren ende ionghe bocken ende andere beesten: ende drie dusent ossen. Ende dit van alle den goede des conincs.

8

Ende sijn hertoghen hebben ghebrocht willichlic dat sij gheloeft hadden: also wel den volc als den priesteren ende leuiten Mer helchias ende zacharias ende ihehihel princen shuys des heren hebben ghegheuen den priesteren om te maken paesschen twe dusent ses hondert beesten tsamen ghemengt: ende drie hondert ossen.

9

Mer chonenias ende semeias oec ende nathanael sijn broederen. ende asabias ende iahihel ende iozabad princen der leuiten. hebben ghegheuen den anderen leuiten om te vieren paesschen. vijfdusent cleenre beesten: ende vijfhondert ossen.

10

Ende die dienst is bereit ende die

[p. *87]

priesteren stonden in hoeren dienst: ende die leuiten in hoeren scaren na des conincs ghebot:

11

ende paesschen is gheoffert Ende die priestren stroyden bloet mit hore hant: ende die leuiten toghen of die vellen der offerhande die verbrant worden

12

ende sceiden die. om te gheuen doer die husen ende familien hore alre. ende om gheoffert te worden den heer als ghescreuen staet inden boeck moysi. Ende van den ossen hebben sij ghelijc ghedaen.

13

Ende hebben ghebraden tpaeschlam opt vier: na dat inder wet ghescreuen is. Ende vreedmakende offerhanden hebben sij ghecooct. in ketelen ende potten: ende hebben die haestelic ghedeelt alle den volc:

14

mer hem seluen ende den priesteren hebben sij na bereet. Want inder offeringe der ghebarnder offerhanden. ende der vetticheden waren die priesteren onledich hent totter nacht: waer om die leuiten bereiden hem seluen ende priesteren der sonen aaron alre leste.

15

Mer die sanghers sonen asaph stonden in hoer ordinancie: na thebot dauid ende asaph ende eman ende ydithun der propheten sconincs. Mer die doerwaerders bewaerden doer allen poorten: also dat si niet een cleine tijt afghinghen van den dienst Ende daer om die leuiten hoer broederen bereiden hem spijse.

16

Ende al die dienst des heren is wittelic volbracht in dien daghe: dat sij maken souden paesschen. ende offeren ghebrande offerhanden op den outaer sheren: na tghebot des conincs iosie.

17

Ende die kinderen die daer gheuonden waren hebben ghemaect passchen in die tijt ende hoochtijt der onghegester broden: seuen daghen.

18

Niet en heeft gheweest paesschen ghelijc desen in israhel van den daghen samuels des propheten: mer oec niemant van al den coninghen israhel heeft ghemaect paesschen den priesteren ende leuiten ende al iude ende israhel die gheuonden was: ende wonende in iherusalem.

19

Int achtiende iaer des rijcs iosie: is dat paesschen gheviert.

20

Doe iosias den tempel reformeert had. is op gheclommen nechao die coninc egipti om te strijden. in carchamis bij eufraten: ende iosias is hem te moet ghegaen.

21

Ende hij. doe hij boden ghesent had tot hem seide. Wat is my ende di coninc iuda? Niet teghen di coem ic huden. mer ic strijde teghen een ander huys: tot welken mij god gheboden heeft haestelic te gaen. Laet of te doen teghen god die mit mi is: dat hij dij niet en dode.

22

Iosias en heeft niet ghewilt weder keren mer heeft bereit strijt teghen hem: noch en heeft niet gheuolcht den sermonen nechao wt den monde gods: mer hi heeft ghcreist om te striden in den velde mageddo.

23

Ende daer ghewont van den scutten seide hi sijnen knechten. Leidt mi wt van den strijde: want ic bin seer ghewondet.

24

Ende si setten hem ouer vanden waghen in enen anderen waghen die hem nauolchde na conincliker ghewoenten: ende hebben hem ghebrocht in iherusalem. Ende hi is ghestoruen. ende begrauen int graf sijnre vaderen: ende al iuda ende ihersalem hebben hem bescreit:

25

ende ieremias alremeest: welcs alle sangheren ende sangsteren weder om halen die bescreyinghen

[p. *88]

op iosiam hent tot desen daghe: ende als een wet ist ghehouden in israhel. Siet het wort gheseit gescreuen inden bescreiinghen.

26

Mer die andere der sermonen iosie. ende sijnre bermharticheden die gheboden sijn in die wet sheren:

27

ende sijn werken eerst ende lest sijn ghescreuen int boeck der coninghen iuda ende israhel.