Bible in duytsche (Delftse bijbel 1477)

§ Capittel .xxxvi

1

HIer om heeft tvolc des lants ghenomen ioachaz den soon iosie: ende heeft hem gheset coninc voer sinen vader in iherusalem.

2

Drie ende twintich iaren was out ioachaz doe hi began te regneren: ende drie maenden regneerde hi in iherusalem.

3

Mer die coninc van egipten heeft hem af geset doe hij in iherusalem ghecomen was: ende heeft veroerdelt dat lant in hondert ponden siluers: ende in een pondt gouds.

4

Ende heeft voer hem gheset enen coninc eliachim sijnen broeder op iudam ende iherusalem ende verwandelde sijnen naem ioakim. Mer ioachaz heeft hij wit hem ghenomen: ende ghebrocht in egipten.

5

Vijf ende twintich iaren was out ioakim doe hij began te regneren ende regneerde elf iaren in iherusalem: ende heeft ghedaen quaet voer den heer sijnen god.

6

Teghen desen is op gheclommen nabuchodonosor die coninc van caldeen: ende heeft hem gheleedt ghebonden mit kettenen in babilonien:

7

ende tot daer heeft hij ouerghedraghen des heren vaten. ende heeft die gheset in sijnen tempel.

8

Mer die andere der woerden ioakim. ende sijn ontaemlicheden die hi ghewrocht heeft. ende die gheuonden sijn in hem: wordden ghehouden in den boeck der coninghen iuda ende israhel Ende sijn soon ioachin regneerde voer hem.

9

Acht iaer was out ioachin doe hij began te regneeren: ende drie maenden ende tien daghen regneerde hij in iherusalem: ende heeft ghedaen quaet inden aenscijn sheren

10

Ende doe een iaer omgheghaen was: heeft die coninc nabuchodonosor boden gesent die oec hem toeleiden in babilonien: doe sij of ghedraghen hadden die costelike vaten shuys des heren Mer hij heeft gheset sedechiam sijnen oem coninc op iudam ende iherusalem.

11

Een ende twintich iaren was out sedechias doe hi began te regneeren: ende elf iaer regneerde hi in iherusalem.

12

Ende hij heeft quaet ghedaen in den oghen sijns heren gods: noch hi en heeft niet ghescaemt voert aensicht iheremie des propheten sprekende tot hem wt den monde des heren.

13

Ende hi is wech ghegaen vanden coninc nabuchodonosor die hem besworen had bi god: ende heeft verhardt sijnen nac ende hert: dat hij niet en soude weder keren totten heer god israhel.

14

Mer oec alle die princen der priesteren ende tvolc hebben ouerghetreden booslike na alle die versmadinghe der heidenen: ende hebben ontreint thuys sheren. dat hij hem seluen gheheilicht had in iherusalem.

15

Mer die heer god hoere vaderen sende tot hem doer die hant sijnre boden opstaende inder nacht ende daghelics vermaende:daer om dat hy sparen soude sijn volc ende sijn woninghe.

16

Ende sij bespotten die boden gods ende versmaden sijn reden: ende bescempten die propheten: also langhe dat die

[p. *89]

toirn des heren opclam in sijn volc. ende daer en was gheen boet teghen.

17

Want hi heeft ghebrocht op hem die coninc van chaldeen: ende heeft ghedoot hoer ionghelinghen mitten swaerde inden huse des sanctuarijs. Hi en heeft niet ontfermt des ionghelincs ende maechdes ende des oudes noch des gheens die nederwert cromt: mer al heeft hijse ghegheuen in sijnen handen:

18

ende hi heeft ouerghedraghen in babilonien alle vaten shuys des heren. also wel die meeste als die minste. ende scatten des tempels ende des conincs ende der princen.

19

Ende die vianden hebben ghebarnt thuys gods: ende destrueert die muer iherusalem. Alle toornen hebben sij ghebarnt: ende hebben verderft al dat costel was.

20

Wast sake dat yemant ontghing tsawert die gheleet in babilonien heeft ghedient den coninc ende sijnen sonen: al so langhe tot dat regneren soude die coninc van persen.

21

ende veruolt soude worden die reden sheren wt den monde iheremie: ende die aerde soude vieren hoer sabbaten. Want in al den daghen des mistroestes heeft si ghehouden sabboth: hent dat veruolt waren tseuentich iaren.

22

Mer int eerste iaer cyri des conincs van persen om te volbrenghen die reden sheren die hi ghesproken had doer den mont iheremie. heeft hi verwect den gheest cyri conincs van persen: die heeft gheboden ghepredict te worden in al sijnen rijc oec ouermits scriften segghende.

23

Dese dinghen seit cyrus die coninc van persen. Die heer god shemles heeft mij ghegeuen alle die rijcken der aerden: ende hi heeft mij gheboden dat ic hem timmeren soude een huys in iherusalem welc is in iudea. Wie van v is in al sijnen volc? Die heer sijn god sij mit hem. ende clim op