Bible in duytsche (Delftse bijbel 1477)

§ Ca .xxxiiij.

1

ACht iaer was out ozias doe hij began te regneeren: ende een ende dertich iaer regneerde hi in iherusalem

2

Ende hi heeft ghedaen dat rechtuaerdich was inden aenscijn sheren: ende wanderde inden weghen dauid sijns vaders: ende en heeft uiet gheweken noch totter rechter hant noch totter luchter hant

3

Mer int achte iaer sijns rijcs doe hij noch kint was. heeft hij begonnen te soeken god sijns vaders dauid: ende in twaelfste iaer doe hij had begonnen. heeft hi ghereinicht iudam ende iherusalem vanden hoghen ende bosschen ende beelden ende afgoden.

4

Ende sij heben destrueert voer hem die outaren baalim: ende si hebben te broken die beelden die daer op waren gheset. Ende heeft oec wtghehouwen die bosschen ende die beelden te broken: ende heeft die sticken ghestroit op hoer grauen die hem plaghen te offeren.

5

voert meer heeft hij ghebarnt die ghebeente der priesteren op den outaren der afgoden: ende heeft ghereinicht iudam ende iherusalem.

6

Mer oec inden steden manasse ende ephraim ende symeon tot neptalim heeft hij alle dese omghekeert.

7

Ende doe hij die outaren destrneert had ende die bosschen ende die beelden te wreuen in sticken. ende al die templen verderft had van al den lande israhel: is hi weder ghekeert in iherusalem.

8

Hier om int achtiende iaer sijns rijcs doe tlant ghereinicht was ende die tempel des heren: heeft hi ghesent saphan enen soon eselie ende maasiani den prince des stedes. ende ioha den soon ioachaz cancellier: dat si souden weder maken thuys sheren sijns gods

9

Ende sij sijn ghecomen tot helchiam den groten priester: ende doe sij ghelt van hem ontfanghen hadden dat ghebrocht was int huys sheren ende dat di leuiten ende doerwaerders vergadert hadden van manasse ende ephraim ende van alden ouerbliuinghen israhel. ende van al iuda ende beniamin ende vanden woonres iherusalem:

10

hebbent sij ghegheuen inden handen der meesteren die ouer die werclude waren inden huyse sheren: om te reformeren den tempel. ende weder te maken al dat cranc was.

11

Ende si hebben dat ghelt ghegheuen den wercluden ende metselaers om te copen stenen vanden steenhouwers. ende houten tot vergadering des timmers: ende tot die tsamenspanninghe der husen. welc die coninghen iuda destrueert hadden.

12

Ende sij maecten trouwelic alle dinghen. Ende die opperste der wercluden waren iadab ende abdias vanden sonen merari. zacharias ende mosollam vanden sonen caath

[p. *85]

die twerck regeerden: alle leuiten connende singhen mit organen.

13

Mer op die gheen die droeghen lasten tot menigherlei brukinghe: waren scriben. ende meester vanden leuiten doerwaerders.

14

Ende doe sij wt droeghen tghelt dat inghedraghen was inden tempel sheren. vant helchias die priester een boeck des wets sheren ouermits die hant moysi:

15

ende seide tot saphan den meester. Ic heb gheuonden dat boeck des wets in den huse sheren. Ende hi heeftet hem ghegeuen.

16

Ende die droech tboeck totten coninc: ende bootscapte hem segghende Siet alle dinghen die du ghegheuen hebste in die hant dijnre knechten: worden volbracht.

17

Tsiluer dat gheuonden is inden huys sheren hebben sij tsamen ghegoten: ende is ghegeuen den meesteren der wercluden. ende die menigherlei wercken smeden:

18

voertmeer heeft helchias die priester mij ghegeuen dit boeck. Ende doe hi dat boeck ghelesen had daer die coninc teghewoerdich was

19

ende hi ghehoert had die woerden des wets. heeft hij ghesneden sijn clederen:

20

ende heeft gheboden helchie ende aicham den soon saphan. ende abdon den soon micha. ende saphan den doctoer. ende asaie des conincs knecht segghende.

21

Gaet ende bidt den heer voer mij ende voer die ouerblijuinghe israhel ende iuda: van al den sermonen des boecks dat gheuonden is. Want grote toirn sheren is ghedropen op ons: daer om want onse vaderen niet bewaert hebben die woerden sheren. om te doen alle die dinghen die ghescreuen sijn in desen boeck.

22

Hier om is ghegaen helchias ende dese die tsamen van den coninc ghesent waren tot oldan prophetisse een wijf sellum een soons thecuath. die soon was aras des bewarers der clederen. welc woonde in iherusalem in secunda: ende hebben tot hoer ghesproken die woerden die wi voer vertelt hebben

23

Ende si antwoerde hem. Dit seit die heer god israhel. Segt den man die v ghesent heeft tot mij.

24

Dit seit die heer. Siet ic sal inleiden quade dinghen op dese stede ende op hoer woonres: ende alle die malediinghe die ghescreuen sijn in desen boeck. die sij ghelesen hebben voer den coninc iuda:

25

want si mij ghelaten hebben ende hebben gheoffert vreemde goden. dat sij mij verwecken souden tot gramscap in al den werken hoere handen. Daer om sal mijn toirn neder vallen op dese stede: ende sal niet worden wtghedaen

26

Mer totten coninc iuda die v ghesent heeft om den heer te bidden spreect aldus. Dit seit die heer god israhel. Want du ghehoert hebste die woerden des boecs.

27

ende dijn hart ghemorwet is. ende du biste veroetmoedicht inden aenscijn des heren van dese dinghen die ghesproken sijn teghen dese stede ende die woonres iherusalem: ende du ontsiende mijn aensicht hebste ghesneden dijn clederen ende hebste ghescreit voer mij: ende ic heb dij verhoert seit die heer.

28

Want te hant sal ic di vergaderen tot dijnen vaderen: ende du salste worden inghedraghen in dijn graft in vreden: ende dijn oghen sullen niet sien dat quaet dat ic brenghen sal op dese stede ende op

[p. *86]

die woonres deser stede. Ende sij hebben den coninc weder vertelt alle woerden die sij ghesproken had.

29

Ende hij tsamen gheropen al den ouderen iuda ende iherusalem

30

is op gheclommen in den huse sheren: ende te gader alle die mannen iuda ende die woonres iherusalem. priesteren ende leuiten ende al tvolc vanden minsten totten meesten. Ende doe sijt alle hoerden in den huse des heren heeft die coninc ghelesen alle die woerden des boecks:

31

ende staende in sijnen stoel heeft gheslaghen een voerwaerd mitten heer dat hij wanderen soude na hem. ende bewaren die gheboden ende ghetugen ende sijn rechuaerdicheden in al sijnre herten. ende in al sijnre zielen: ende soude doen die dinghen die ghescreuen sijn in desen boeck dat hi ghelesen had.

32

Ende hij heeft daer op ghezworen al die gheuonden waren in iherusalem ende beniamin: ende die woonres iherusalem hebben ghedaen na die vorwaerd sheren gods hoere vaderen.

33

Hier om heeft iosias afghenomen al die ombetaemelicheden van al den landen der kinderen israhel: ende heeft ghedaen dat alle die ouerbleuen waren in israhel dienen souden den heer sijnen god. In al sijnen daghen en sijn sij niet afghegaen van den heer god hoere vaderen.