Bible in duytsche (Delftse bijbel 1477)

§ Ca .xxxiij

1

MAnasses was twalf iaer out doe hi began te regneeren: ende vijf ende vijftich iaren heeft hij regneert in iherusalem.

2

Mer hi heeft quaet ghedaen voerden heer na die versmadinghe der volken die die heer heeft omghekeert voer den sonen israhel:

3

ende hij omghekeert heeft weder ghemaect die hoocheiden die sijn vader ezechias had destrueert: ende heeft ghetimmert die outaren baalim. ende heeft ghemaect die bosschen: ende heeft aenghebeden al heerscappie des hemels ende heeft die gheeert.

4

Ende hi heeft ghetimmert outaren in den huyse sheren: van welken die heer gheseit had in iherusalem sal mijn naem sijn inder ewicheit

5

Ende hi heeft die ghetimmert al der scaren des hemels. in twee salen shuys

[p. *83]

des heren:

6

ende hi dede sijn sonen gaen doert vuer inden dal benhennon. Hij bewaerde die dromen. hi nauolchde die wijghelinghen: ende dienden den swarten consten. Hi hadde mit hem gokelaers ende besweraers: ende heeft ghedaen veel quaden voer den heer dat hi hem vertornen soude.

7

Ende hij heeft gheset in den huyse sheren wtghesneden beelden ende ghegoten: van welken die heer ghesproken heeft tot dauid ende tot salomon sijnen soon segghende. In desen huse ende in iherusalem welc ic vercoren heb van al den gheslachten israhel sal ic setten minen naem int ewich:

8

ende ic niet en sal israhel doen roeren den voet vander aerden die ic ghegheuen heb hoeren vaderen: alleen alsoe ist dat sij bewaren te doen dat ic hem gheboden heb ende al die wet ende cerimonien ende oerdelen die ic gheboden heb ouermits. die hant moysi.

9

Hier om heeft manasses verleit iudam ende die woonres iherusalem: dat sij quaet ghedaen hebben bouen allen volken welc die heer omghekeert had vanden aenscijn der kijnderen israhel.

10

Ende die heer heeft tot hem ghesproken ende tot sijnen volc: ende si en woudent niet aenmerken.

11

Daer om heeft hi op hem gheleit die princen des heers des conincs van assirien: ende hebben gheuanghen manassen: ende hebben hem gheleet ghebonden mit kettenen ende boyen in babilonien.

12

Ende doe hij benauwet was bat hi den heer sijnen god: ende heeft ghedaen sterkelic penitenci voer god sijnen vaderen

13

Ende heeft hem ghebeden aendachtelic. ende hi heeft verhoert sijn ghebet: ende heeft hem weder gheleit tot iherusalem in sijn rijc: ende manasses heeft ghekent dat die heer god is.

14

Hier na heeft hij ghetimmert een muer buten die stat dauid totten westen gion. in den dale van den inganc des poorts der wisschen doer den omganc hent tot ofel: ende heeft die seer hooch ghemaect Ende heeft gheset princen des heers in allen ghemuerden steden iuda.

15

ende heeft af ghenomen vreemde goden. ende beelden vanden huyse sheren: ende outaren die hi ghemaect had in den borch shuys des heren ende in iherusalem: ende heeft gheworpen alle dese wt die stede.

16

Mer hij heeft reformeert dat outaer sheren: ende offerde daer op offerhande ende vreedmakinge ende lof: ende heeft gheboden iude dat sij dienen souden den heer god israhel.

17

Mer noch offerde tvolc inden hoghen den heer sijnen god.

18

Mer die andere der werken manasse. ende sijn ghebet tot sijnen god: ende die woerden der propheten die si spraken tot hem in den naem des heren gods israhel. worden ghehouwen in den sermonen der coninghen israhel.

19

Ende sijn ghebet ende sijn verhoering ende alle sonden ende versmadinghe: ende oec die steden in welken hij timmerde die hoocheiden ende maecte bosschen ende beelden eer hi dede penitenci: sijn ghescreuen in den sermonen ozai.

20

Ende manasses heeft gherust mit sijnen vaderen: ende si hebben hem begrauen in sijn huys: ende voer hem regneerde sijn soon amon.

21

Twe ende twintich iaer was out amon doe hij began te regneeren: ende regneerde twe

[p. *84]

iaer in iherusalem.

22

Ende heeft quaet ghedaen inden aenschijn sheren als ghedaen had sijn vader manasses: ende offerde ende diende al den afgoden die manasses ghemaect had:

23

ende en heeft niet ontsien taensicht sheren als ontsach manasses sijn vader: ende veel meer heeft hij ghesondicht.

24

Ende doe teghen hem tsamen ghesworen hadden sijn knechten doden sij hem in sijnen huse:

25

mer die ander scare des volcs doe sij ghedoot hadden die amon sloghen. hebben si gheset iosiam sijnen soon coninc voer hem.