Bible in duytsche (Delftse bijbel 1477)

§ Ca .xxxij.

1

ENde na desen is ghecomen sennacherib die coninc van assirien: ende inghegaen in iudam heeft beleghen die stercke steden. willende die nemen

2

Doe ezechias dat hadde ghesien als dat sennacherib ghecomen was ende alle die anstoet des strides wart ghekeert teghen iherusalem:

3

ghinc hij te rade mit den princeu ende sterken mannen dat sij stoppen souden die beghinselen der fonteynen die buten die stede waren: ende doe dat ondersceyde die sentencie van hem allen

4

heeft hij vergadert een grote scare: ende heeft ghestopt alle fonteynen. ende die riuier die vloeide int middel des lands segghende. Op dat die coninghen van assirien niet en sullen comen: ende vinden oueruloedicheit der wateren.

5

Ende cloeclic werckende heeft ghetimmert alle muren die destrueert waren: ende toornen daer bouen: ende buten een ander mure. Hi heeft reformeert mello in die stat danid: ende heeft ghemaect wapen van allen manieren ende scilden.

6

Ende heeft gheset princen der wachters inden heer: ende al te samen gheropen in die straet

[p. *81]

der poorten des stedes: ende heeft ghesproken tot hoer hart segghende.

7

Doet manlike ende wart ghestarct: en wilt niet ontsien: noch vruchten den coninc van assirien. ende al die scare die mit hem is Want veel meer sijn mit ons dan mit hem.

8

Want mit hem is een vleischlic arm: mit ons is die heer onse god die onse hulper is: ende strijt voer ons. Ende tvolc is ghestarct mit desen woerden ezechie des conincs iuda.

9

Doe dese dinghen ghedaen waren: heeft sennacherib die coninc van assirien sijn knechten ghesent tot iherusalem. want hij mit al sijnen heer had beleghen lachis: tot ezechiam den coninc iuda. ende tot al tvolc dat inder stede was segghende.

10

Dit seit sennacherib die coninc van assirien. In welken hebdi betrouwenisse. ende sit beleghen in iherusalem?

11

Heeft v ezechias bedroghen. dat hij v leueren sal den dode in hongher. ende dorst: segghende dat die heer v god sal v verlossen vander hant des conincs van assirien?

12

En is dit niet die ezechias die destrueert heeft sijn hoocheiden ende outaren: ende heeft gheboden iude ende iherusalem segghende. voer een outaer suldi aenbeden. ende op dat suldi barnen wieroec?

13

Ende weet ghi niet wat ic ghedaen heb. ende mijn vaderen allen volken der aerden? Hebben die goden der volken ende alre landen moghen verlossen hoer lant van mijnre hant?

14

Wie is van alden goden der heiden die mijn vaderen destrueert hebben die mochte verlossen sijn volc van mijn hant: dat v god soude moghen verlossen van mijn hant?

15

Hier om en laet v ezechias nietbedrieghen: noch mit idelen raet bespotten: noch en gheloeft hem niet. Want ist sake dat gheen god al der volken ende lant scappen heeft moghen verlossen sijn volc van mijn hant ende van die hant mijnre vaderen: soe en sal v god niet moghen verlossen van dese hant.

16

Mer oec veel ander woerden hebben ghesproken sijn knechten teghen god den heer: ende teghen ezechiam sijnen knecht.

17

Ende hi heeft oec ghescreuen brieuen vol blasphemien teghen den heer god israhel: ende heeft ghesproken teghen hem. Ghelijc als die goden al der andere volken niet en mochten verlossen hoer volc van mijn hant: alsoe en sal oec niet moghen verlossen die god ezechie sijn volc van mijn hant.

18

Ende voert meer heeft hij gheluut ghemaect mit groten ropen in ioedscher tale teghen tvolc dat sat in den muren iherusalem: om dat hi die veruaeren soude. ende winnen die stede.

19

Ende hi heeft ghesproken teghen god israhel: als teghen die goden der volken des aerdes die werken der menschen handen.

20

Hier om hebben ezechias die coninc. ende ysaias die propheet een soon amos ghebeden teghen dese blasphemie: ende hebben gheropen tot in den hemel

21

Ende die heer heeft ghesent sijnen enghel: die heeft gheslaghen alle sterke mannen ende strijders ende princen sheers des conincs van assirien: ende hij is weder ghekeert mit scande in sijn lant Ende doe hi inghegaen was thuys sijns gods: hebben sijn soneen die wt gegaen waren wt sijnen buyc hem ghedoot

[p. *82]

mitten swaerde.

22

Ende die heer heeft behouden ezechiam ende die woenres iherusalem van die hant sennacherib des conincs van assirien.ende van der hant alre princen: ende heeft hem gegeuen rust in den omganc.

23

Ende veel hebben oec ghebrocht offerhanden ende sacrificien den heer in iherusalem: ende ezechie den coninc iuda gauen. Ende na desen is hij verheuen voer allen volken.

24

In dien daghen was ezechias siec totter doot: ende heeft ghebeden den heer. Ende hij heeft hem verhoert ende gaf hem een teiken:

25

mer hi en heeft niet weder ghegheuen na die weldaden die hi ontfanghen had: want sijn hart wort verheuen. Ende die toirn is gheworden teghen hem: ende teghen iudam ende iherusalem

26

En hi is vernedert daer na. om dat sijn hert verhoocht was: also wel hij als die woonres iherusalem: ende daer om is die toirn des heren niet ghecomen op hem inden daghen ezechie.

27

Ende ezechias was rijc ende seer glorioos: ende hadde vergadert veel scatten siluers ende gouds. ende costeliker ghesteenten. welrukende cruden ende wapen van allen manieren. ende costelike vaten:

28

ende apteken des tarwes wijns ende olijs. ende crebben alre beesten ende scaeps coyen.

29

ende heeft ghetimmert ses steden. Want hi hadde ontellike scaren der scapen ende beesten: want die heer hadde hem ghegheuen seer veel goets.

30

Dit is ezechias die stopte die ouerste fonteyn der wateren gyon: ende heeft die ofghekeert onder totten westen der stat dauid: In al sijnen werken heeft hij voerspoedelic ghedaen wat hi woude.

31

Nochtan inder sendinghe der princen babilonis die ghesendt waren tot hem. om te vraghen vanden wonderliken dinghe dat gheuallen was opter aerden. heeft hem die heer ghelaten: dat hij gheproeft soude werden. ende al die dinghen die waren in sijnre herten bekent souden worden.

32

Mer die andere der sermonen ezechie. ende sijnre barmherticheiden sijn ghescreuen inden visioen ysaie des propheten. eens soons amos: ende in den boock der coninghen iuda ende srahel.

33

Ende ezechias heeft gherust mit sijnen vaderen: ende si hebben hem begrauen op die grauen der soenen dauid. Ende al iuda ende al die woonres iherusalem hebben ghedaen sijn exequien: ende manasses sijn soon regneerde voer hem.